పంజా విసిరిన లేడీ సింగం

అక్ష‌య్ కుమార్, అజ‌య్ దేవ‌గ‌న్, ర‌ణ్ వీర్ సింగ్ లాంటి స్టార్ల‌ను పోలీస్ పాత్ర‌ల్లో చూపించారు రోహిత్ శెట్టి. ఇప్పుడు దీపికప‌దుకొనేకి అలాంటి ఒక అరుదైన అవ‌కాశం ద‌క్కింది. ఇంత‌కుముందు షారూఖ్ ప‌ఠాన్ లో లేడీ ఏజెంట్ పాత్ర‌లో న‌టించిన దీపిక ఇప్పుడు రియ‌ల్ కాప్ అవ‌తార్ లో అద‌ర‌గొట్ట‌బోతోంద‌న‌డానికి తాజాగా రిలీజైన ఈ ఫ‌స్ట్ లుక్ సాక్ష్యం.

రోహిత్ శెట్టి `సింగం ఎగైన్` చిత్రంలో శక్తి శెట్టిగా దీపికా పదుకొణె లుక్ సోషల్ మీడియాలో రివీల్ అయింది. రణవీర్ సింగ్- అజయ్ దేవగన్ ఆమెను కాప్ విశ్వంలోకి స్వాగతించారు. హృతిక్ రోషన్ లేడీ సింగం గెట‌ప్‌ని ప్రశంసించారు. దీపిక భీకరమైన అవతార్ చాలామంది ఇతర సినీప్రముఖులను కూడా ఆకట్టుకుంది. అజయ్ దేవగన్ , కరీనా కపూర్ ఖాన్ ప్ర‌ధాన పాత్ర‌ల్లో నటించిన ఈ చిత్రం 2024 స్వాతంత్య్ర‌ దినోత్సవం రోజున విడుదల కానుంది. ఈ చిత్రంలో రణవీర్ సింగ్ , అక్షయ్ కుమార్ ప్రత్యేక పాత్రల్లో కనిపించనున్నారు. దీపిక `కల్కి 2898 AD`..ఫైటర్ సహా ఇతర ప్రాజెక్ట్‌ల్లోను న‌టించ‌నుంది.

`సింగం ఎగైన్` నుండి దీపికా పదుకొణె డ్యాషింగ్ పోలీస్ అవతార్ సోషల్ మీడియాల్లో ఇప్పుడు వైర‌ల్ గా మారింది. రణ్‌వీర్ తన లేడీ ల‌వ్‌ను ఉత్సాహపరిచేందుకు సోష‌ల్ మీడియాల్లో ఆస‌క్తిక‌ర వ్యాఖ్య‌ల్ని జోడించాడు. ``ఆలీ రే ఆలీ...లేడీ సింగం ఆలీ ! కాప్- యూనివ‌ర్శ్‌లోకి శక్తి శెట్టి వచ్చారు !`` ఈ కాప్ యూనివర్స్‌లో సింగమ్‌గా నటించిన అజయ్ దేవగన్ కూడా దీపిక‌కు స్వాగతం పలుకుతూ..నా స్క్వాడ్‌కి స్వాగతం దీపికాపదుకొనే.. అని వ్యాఖ్యానించారు. దీపికా పదుకొణె శక్తి శెట్టిగా కాప్ విశ్వంలోకి చేర‌డంతో అభిమానులు సంబ‌రాల్లో మునిగిపోయారు. దీపిక లుక్ పై ఫ్యాన్స్ జోరుగా ప్ర‌శంస‌లు కురిపిస్తున్నారు.

ఆమె లుక్‌పై వ్యాఖ్యానిస్తూ హృతిక్ రోషన్, ``అద్భుతం .. చక్కగా చేసారు`` అని రాశారు. అలియా భట్, జాన్వీ కపూర్, టైగర్ ష్రాఫ్ స‌హా చాలా మంది ప్ర‌ముఖులు దీపిక‌ భీకరమైన అవతారంపై ప్ర‌శంస‌లు కురిపించారు. అక్షయ్ కుమార్ కూడా దీపికా పదుకొణెకు ఘన స్వాగతం పలికారు. పోస్టర్‌లో దీపిక పోలీసు యూనిఫాం ధరించి, మండుతున్న వాహ‌నం ముందు కూర్చుని, ఒక వ్య‌క్తి నోట్లో తుపాకీ గురిపెట్టి క‌నిపించింది. మంట‌లు మండుతూ ర‌ణ‌క్షేత్రంలా ఉన్న ఆ చోట దీపిక ముఖంలో చిరున‌వ్వు చెద‌ర‌క‌పోవ‌డం చూస్తుంటే ఘ‌ర్ష‌ణ‌లోను లేడీ సింగం కామిక్ టైమింగ్ మిస్ కాద‌ని అర్థం చేసుకోవాలి.

ఈ చిత్రం 2024 స్వాతంత్య్ర‌ దినోత్సవం రోజున ప్రేక్షకుల ముందుకు రానుంది. అల్లు అర్జున్ `పుష్ప 2`తో పెద్ద క్లాష్ అవుతుంది. అజయ్ దేవగన్ - కాజల్ అగర్వాల్ నటించిన `సింగం` 2011లో విడుదలైంది, ఆ తర్వాత 2014లో `సింగం రిటర్న్స్` విడుదలైంది. రెండు ప్రాజెక్ట్‌లు బాక్సాఫీస్ హిట్‌లుగా నిలిచాయి. రణ్‌వీర్ సింగ్ , అక్షయ్ కుమార్ కూడా `సింగం ఎగైన్`లో ప్రత్యేక పాత్రల్లో క‌నిపిస్తున్నారు. వారి సింబా - సూర్యవంశీ పాత్రలను తిరిగి పోషించనున్నారు. ఈ పోలీసు డ్రామాతో పాటు, ప్రభాస్ సరసన `కల్కి 2898 AD` అనే సైన్స్ ఫిక్షన్ యాక్షన్ ఫిల్మ్‌లో కూడా దీపిక కనిపించనుంది. సిద్ధార్థ్ ఆనంద్ తదుపరి ఏరియల్ యాక్షన్ థ్రిల్లర్ చిత్రం `ఫైటర్`లో హృతిక్ రోషన్ సరసన న‌టిస్తోంది.

ఇండియ‌న్ పోలీస్ ఫోర్స్:

సిద్ధార్థ్ మల్హోత్రా, శిల్పాశెట్టి, వివేక్ ఒబెరాయ్ లతో రోహిత్ శెట్టి `ఇండియన్ పోలీస్ ఫోర్స్` అనే వెబ్ సిరీస్ ని రూపొందిస్తున్న సంగ‌తి తెలిసిందే. ఈ సిరీస్ స్ట్రీమింగుకి కొత్త విడుదల తేదీని ప్లాన్ చేసార‌ని తెలిసింది. ఈ దీపావళికి వెబ్ సిరీస్ స్ట్రీమింగ్ కాద‌ని తెలిసింది. రోహిత్ శెట్టి OTT కాప్ యూనివర్స్ పరిమిత ఎడిషన్ సిరీస్. ఈ సిరీస్ ఆద్యంతం భారీ యాక్షన్‌తో స్పెష‌ల్ ట్రీట్ కానుంది.