యానిమల్​.. రైట్​ వేలో సందీప్ వంగా స్ట్రాటజీ!

దర్శకుడు సందీప్ వంగా నుంచి రాబోతున్న పాన్ ఇండియా ఫిల్మ్ యానిమల్. భిన్నమైన క్రైమ్ డ్రామా కథాంశంతో రూపొందిన చిత్రమిది ఈ చిత్రంపై భారీ అంచనాలు ఉన్నాయి. అందుకు తగ్గట్టే ప్రమోషనల్ మెటీరియల్ కూడా ఉంటోంది. సినిమాలో ఉన్న తండ్రి కొడుకులు, భార్య భర్తల మధ్య ఉండే లవ్​, ఎమోషన్స్​.. అలాగే వైలెన్స్​.. ఇలా ఓ సినీ ప్రేక్షకుడికి కావాల్సిన వివిధ అంశాలు చిత్రంలో పుష్కలంగా ఉన్నట్లు ప్రచార చిత్రాల్లో కనిపిస్తున్నాయి.

ప్రీ టీజర్​, టీజర్​లో రణ్​బీర్​ కపూర్ వైలెంట్ అవతార్​, తండ్రిపై ప్రేమ ఉన్నప్పటికీ మనస్పర్థలు, ఫస్ట్ సింగిల్​లో రణ్​బీర్ కపూర్​ - రష్మిక మధ్య బ్యూటిఫుల్ రొమాంటిక్​ రిలేషన్ షిప్​ ఇలా చాలానే ఎలిమెంట్స్​ను చూపించారు. ఇక రీసెంట్​గా విడుదలైన సెకండ్ సింగిల్​లోనూ పెళ్లి తర్వాత భార్య-భర్తల మధ్య ఉండే రిలేషన్​ షిప్​, ఇద్దరి మధ్య ఉండే ప్రేమానురాగాలు, వచ్చే సమస్యలు, మనస్పర్థలు, విభేదాలు, ఆ తర్వాత ఒకరినొకరు అర్థం చేసుకోవడం వంటివి మనసును తాకేలా ఎంతో చక్కగా చూపించారు.

మొత్తంగా ఈ ప్రచార చిత్రాల్లోని అంశాలను చూస్తే.. మానవ భావోద్వేగాల్లోని వివిధ కోణాలను లోతుగా చూపిస్తూ.. ప్రేక్షకుల్ని థ్రిల్లింగ్ రైడ్​కు తీసుకెళ్తుందని అర్థమవుతోంది. అందుకే సినిమాపై ప్రేక్షకుల్లో మంచి అంచనాలు కూడా పెరుగుతున్నాయి. ఫైనల్​గా సందీప్ వంగా అన్నీ వర్గాల ఆడియెన్స్​కు బాగా రీచ్ అవ్వడానికి.. తన సినిమాను సరైన పద్ధతిలోనే స్ట్రాటజిక్​గా ప్రమోట్ చేస్తున్నారని అనిపిస్తోంది.

కాగా, అర్జున్‌ రెడ్డి చిత్రంతో అందరి దృష్టి తనవైపు తిప్పుకున్నారు దర్శకుడు సందీప్‌ రెడ్డి వంగా. ఇదే చిత్రాన్ని హిందీలో రీమేక్‌ చేసి అక్కడా మంచి విజయాన్ని అందుకున్నారు. దీంతో ఇప్పుడు యానిమల్‌ చిత్రం కూడా ఆయనకు మంచి ఫలితాన్ని అందిస్తుందని అంతా ఆశిస్తున్నారు.

ఇకపోతే ఈ చిత్రాన్ని భూషణ్ కుమార్, క్రిషన్ కుమార్, మురాద్ ఖేతాని, ప్రణయ్ రెడ్డి వంగా సంయుక్తంగా నిర్మించారు. రష్మిక హీరోయిన్​గా నటించగా.. అనిల్ కపూర్, బాబీ డియోల్ కీలక పాత్రలు పోషించారు. ఈ సినిమా డిసెంబరు 1న థియేటర్లలోకి రానుంది.