ఎలక్షన్స్ అయిపోయాయి.. ఇక సినిమాల సౌండ్ షురూ

తెలుగు రాష్ట్రాలలో ఎన్నికల హడావిడి ముగిసింది. ఇన్ని రోజులు పబ్లిక్ అంతా కూడా ఎన్నికల మూడ్ లో ఉన్నారు. ఏపీలో ఎన్నికల బజ్ సోషల్ మీడియాలో ఏ స్థాయిలో ఇంపాక్ట్ క్రియేట్ చేసిందో అందరికి తెలిసిందే. దేశవ్యాప్తంగా ఏపీ ఎలక్షన్స్ సౌండ్ గట్టిగా వినిపించింది. ఆ ఇంపాక్ట్ కాస్త సినిమాల పైన కూడా పడింది. ఒకవైపు సమ్మర్ మరోవైపు ఐపిఎల్ వలన చిన్న సినిమాలపై ప్రభావం గట్టిగానే పడింది.

ఇక ఎన్నికలు ముగియడంతో ప్రజలు కూడా ఆ మూడ్ నుంచి బయటకి వచ్చేయనున్నారు. తెలుగు రాష్ట్రాలలో పబ్లిక్ లో ఎక్కువ బజ్ క్రియేట్ చేసేవి రాజకీయాలు, సినిమాలు. రాజకీయాల హడావిడి ముగియడంతో మళ్ళీ ఐదేళ్ల వరకు ఈ తరహా సౌండ్ ఉండదు. ఏదేమైనా ఎన్నికల రిజల్ట్ రోజు మళ్ళీ బజ్ ఉంటుంది. దీంతో సినిమా వాళ్ళు మళ్ళీ జనాలను ఎట్రాక్ట్ చేసి సినిమాలపై బజ్ పెంచడానికి సిద్ధమయ్యారు. ఇక టాలీవుడ్ లో కూడా దర్శక నిర్మాతలు తమ సినిమాల పబ్లిసిటీ స్టార్ట్ చేసుకుంటున్నారు.

పూరి జగన్నాథ్ దర్శకత్వంలో రామ్ పోతినేని హీరోగా తెరకెక్కుతోన్న పాన్ ఇండియా మూవీ డబుల్ ఇస్మార్ట్. ఇస్మార్ట్ శంకర్ కి సీక్వెల్ గా ఈ సినిమా రెడీ అవుతోంది. మే 15న డబుల్ ఇస్మార్ట్ టీజర్ ని రిలీజ్ చేయడానికి చిత్ర యూనిట్ సన్నాహాలు చేస్తోంది. ఈ మూవీతో డైరెక్టర్ గా పూరి, హీరోగా రామ్ బ్లాక్ బస్టర్ కొట్టాలనే కసితో ఉన్నారు. టీజర్ తోనే రిలీజ్ డేట్ ని కూడా కన్ఫర్మ్ చేయొచ్చనే టాక్ వినిపిస్తోంది.

మే20న యంగ్ టైగర్ ఎన్టీఆర్ దేవర మూవీ ఫస్ట్ సింగిల్ రిలీజ్ చేయనున్నారు. మే 20 ఎన్టీఆర్ పుట్టినరోజు కావడంతో ఫస్ట్ సింగిల్ ని ఆ రోజు వదులుతున్నారు. అనిరుద్ రవిచందర్ ఈ సినిమాకి సంగీతం అందిస్తున్నారు. కొరటాల శివ భారీ కాన్వాస్ పై యాక్షన్ ప్యాక్డ్ మూవీగా దేవర చిత్రాన్ని తెరకెక్కిస్తున్నారు. అదే రోజు ఎన్టీఆర్ చేస్తోన్న బాలీవుడ్ మూవీ వార్ 2 నుంచి ఫస్ట్ లుక్ రిలీజ్ అవుతుందని టాక్.

ప్రశాంత్ నీల్ దర్శకత్వంలో చేయబోయే సినిమాకి సంబందించిన అప్డేట్ కూడా వస్తుందనే మాట వినిపిస్తోంది. అలాగే యంగ్ రెబల్ స్టార్ ప్రభాస్ హీరోగా నాగ్ అశ్విన్ దర్శకత్వంలో తెరకెక్కుతోన్న పాన్ వరల్డ్ మూవీ కల్కి2898ఏడీ ప్రమోషన్స్ కూడా ఈ నెలలోనే స్టార్ట్ కానున్నాయి. ఫస్ట్ సింగిల్ తో పాటు, మూవీ గ్లింప్స్ కూడా రిలీజ్ చేసే అవకాశం ఉందంట. జూన్ 27న ఈ మూవీ ప్రపంచ వ్యాప్తంగా 22 భాషలలో రిలీజ్ కాబోతోంది. మంచు విష్ణు కన్నప్ప మూవీ టీజర్ కూడా ఈ నెలలోనే రిలీజ్ కాబోతోంది. అలాగే మరికొన్ని మీడియం రేంజ్ సినిమాల అప్డేట్స్ కూడా రాబోతున్నాయి.