`కాంతార` ప్రీక్వెల్ ఆడిష‌న్‌కి 25000 మంది!
వీటి నుంచి ఎంపిక చేసిన కొంద‌రు వివిధ పాత్రల కోసం షార్ట్‌లిస్ట్ అయ్యారు.
రిషబ్ శెట్టి ప్ర‌ధాన పాత్ర‌లో న‌టించి స్వీయ‌ద‌ర్శ‌క‌త్వంలో రూపొందించిన `కాంతార` 2022లో అత్యంత విజయవంతమైన చిత్రాలలో ఒకటి. ఇటీవల `కాంతార-ఎ లెజెండ్ చాప్టర్ 1` పేరుతో ప్రీక్వెల్ ని ప్రారంభించారు. ఫస్ట్-లుక్ టీజర్ కి అద్భుత స్పంద‌న వ‌చ్చింది. ఈ సినిమా కోసం కాస్టింగ్ కాల్ కి పిలుపునివ్వ‌గా, ఔత్సాహిక ప్రతిభావంతుల నుండి చిత్ర‌బృందం 25,000 కంటే ఎక్కువ దరఖాస్తులను అందాయ‌ని స‌మాచారం. వీటి నుంచి ఎంపిక చేసిన కొంద‌రు వివిధ పాత్రల కోసం షార్ట్‌లిస్ట్ అయ్యారు. ఇక పాయల్ రాజ్‌పుత్ తారాగణంలో చేరడానికి ఆసక్తిని వ్యక్తం చేసింది.
ప్రీక్వెల్ క‌థాంశం గురించి ప్ర‌జ‌ల్లో ర‌క‌ర‌కాల ఊహాగానాలు సాగుతున్నాయి. ఈ చిత్రం 301- 400 AD కాలంలోని పంజుర్లీ దైవం మూలాన్ని తిరిగి కనుగొనే ప్ర‌క్రియ‌లో ఏం జ‌రిగింద‌నేది తెర‌పై ఆవిష్క‌రిస్తారు. మొదటి సినిమాలాగే, కాంతార చాప్టర్ -1 కి రిషబ్ శెట్టి దర్శకత్వం వహిస్తున్నారు. ఆయ‌నే ర‌చ‌యిత కూడా. ఇంత‌కుముందు రిలీజ్ చేసిన ఫస్ట్ లుక్ పోస్టర్ టీజర్‌లో రిషబ్ శెట్టి భారీ రూపంతో గ‌గుర్పాటుకు గురి చేసాడు.
భీక‌ర‌మైన దేవుడి రూపాన్ని ధరించాక అత‌డిలో కాఠిన్యం ఎలా ఉంటుందో చూపించారు. టీజర్‌లో రిషబ్ ఆకర్షణీయమైన అవతారంలో శివుని త్రిశూలం చేత‌పట్టి క‌నిపించాడు. ఈ ఆయుధం ప్రపంచవ్యాప్తంగా అభిమానుల్లో చ‌ర్చ‌నీయాంశంగా మారింది. త్వ‌ర‌లో మూవీ చిత్రీక‌ర‌ణ ప్రారంభం కానుంది. ప్రధానంగా కన్నడలో చిత్రీక‌రిస్తారు. తెలుగు, తమిళం, మలయాళం, హిందీ, బెంగాలీ,ఆంగ్లంలో విడుదల చేయడానికి ప్లాన్ సిద్ధంగా ఉంది.