'పుష్ప 2'లో ఆ ఒక్క సీక్వెన్స్ కోసమే 60 కోట్లు.. థియేటర్లో పూనకాలే!

మోస్ట్ అవైటెడ్ పాన్ ఇండియా మూవీ "పుష్ప 2: ది రూల్" మరో మూడు వారాల్లో ప్రేక్షకుల ముందుకు రాబోతోంది. 'పుష్ప: ది రైజ్' సీక్వెల్ గా.. ఐకాన్ స్టార్ అల్లు అర్జున్, సుకుమార్ కాంబోలో ఈ యాక్షన్ డ్రామా తెరకెక్కుతోంది. థియేటర్లలో పుష్పరాజ్ ఆట చూడటానికి యావత్ సినీ అభిమానులు ఆసక్తిగా ఎదురుచూస్తున్నారు. ఇక ఈ సినిమాకు సంబంధించిన ప్రతీ విషయం కూడా ఫ్యాన్స్ ను ఎంతో ఎగ్జైట్ చేస్తోంది. ముఖ్యంగా సినిమాలోని జాతర ఎపిసోడ్ విషయాలు బాగా హైప్ ఎక్కిస్తున్నాయి.

'పుష్ప 2' సినిమాలో జాతర ఎపిసోడ్ హైలైట్ గా నిలుస్తుందని చిత్ర వర్గాలు చెబుతూ వస్తున్నాయి. అల్లు అర్జున్ ఫస్ట్ లుక్, టీజర్ లను ఈ సీక్వెన్స్ నుంచే కట్ చేయడంతో.. గంగమ్మ జాతర ఎపిసోడ్ కథలో చాలా కీలకంగా ఉంటుందనేది అర్థమైంది. సినిమాలో నటించిన యాక్టర్ కిల్లి క్రాంతి కుమార్ తాజాగా ఓ ఇంటర్వ్యూలో జాతర సీక్వెన్స్ గురించి మాట్లాడారు. దాదాపు 60 కోట్లు ఖర్చు చేసి ఈ ఎపిసోడ్ ను చిత్రీకరించారని, అవుట్ పుట్ నెక్స్ట్ లెవల్ లో వచ్చిందని చెప్పారు.

"జాతర సీక్వెన్స్ కోసం మైత్రీ మూవీ మేకర్స్ నిర్మాతలు ఆల్మోస్ట్ రూ. 60 కోట్లు ఖర్చు పెట్టారు. సినిమాలో ఆ ఒక్క ఎపిసోడ్ 15 - 18 నిమిషాలు ఉంటుంది. థియేటర్ లో కూర్చున్న ప్రతి ఒక్క ఆడియన్ ఆ సీక్వెన్స్ చూసి షాక్ అవుతారు. కళ్ళార్పకుండా అలా చూస్తూ ఉండిపోతారు. ఇది రాసి పెట్టుకోండి. అంతా బాగా చేశారు. నిజంగా ఔట్ పుట్ మాత్రం నెక్స్ట్ లెవల్ లో వచ్చింది. డైరెక్టర్ సుకుమార్ ఈ ఎపిసోడ్ లో వర్క్ చూసి, ప్రీ క్లైమాక్స్ కూడా అదే ఫైట్ మాస్టర్ కు ఇచ్చారు" అని 'పుష్ప 2' నటుడు క్రాంతి తెలిపారు.

"60 కోట్లు కాకుండా మేము చేసిన ఆ ఫైట్ రిహాసల్స్ కే అదనంగా మరో 14 కోట్లు ఖర్చు చేశారు. అలాంటి ఫేషనేట్ ప్రొడ్యూసర్స్ ఉండటం నిజంగా అదృష్టమే" అని క్రాంతి కుమార్ అన్నారు. 'పుష్ప 2' లో జాతర ఎపిసోడ్ మాత్రం వందశాతం సర్ప్రైజ్ చేస్తుందని చెబుతున్నారు. ఇటీవల ప్రెస్ మీట్ లో నిర్మాతలు సైతం ఈ సీక్వెన్స్ గురించి గొప్పగా మాట్లాడారు. జాతర ఎపిసోడ్ ఒక మాస్టర్ పీస్ అని, గూస్ బమ్స్ వస్తాయని అన్నారు.

జాతర ఎపిసోడ్ కోసం 15-20 రోజులు రిహాసల్స్ చేసి, 35 రోజుల పాటు షూట్ చేసినట్లుగా మైత్రీ నిర్మాతలు తెలిపారు. అల్లు అర్జున్, సుకుమార్ ఈ సినిమా కోసం చాలా కష్టపడ్డారని.. జాతర ఎపిసోడ్ కోసం బన్నీ పడిన కష్టాన్ని దేనితోనూ పోల్చలేమని అన్నారు. ఇప్పుడు నటుడు క్రాంతి కూడా అదే అంటున్నారు. మరి చిత్ర బృందం ఇంతలా చెబుతున్న ఈ సీక్వెన్స్ థియేటర్ లో పూనకాలు తెప్పిస్తుందని అభిమానులు భావిస్తున్నారు.

'పుష్ప: ది రూల్' సినిమాలో అల్లు అర్జున్ సరసన రష్మిక మందన్న హీరోయిన్ గా నటిస్తోంది. శ్రీలీల స్పెషల్ సాంగ్ లో ఆడిపాడనుంది. ఫహాద్ ఫాజిల్ విలన్ గా నటిస్తున్న ఈ సినిమాలో జగపతి బాబు, సునీల్, అనసూయ కీలక పాత్రలు పోషిస్తున్నారు. డిసెంబర్ 5వ తేదీన తెలుగు తమిళ హిందీ కన్నడ మలయాళ భాషల్లో ప్రపంచ వ్యాప్తంగా భారీ స్థాయిలో ఈ సినిమా విడుదల కానుంది.