దేవిశ్రీ ఇంటెన్స్ బీజీఎమ్.. ఇంట్రెస్టింగ్ గా శేఖర్ కమ్ముల 'కుబేర' గ్లింప్స్!

నేషనల్ అవార్డ్ విన్నింగ్ యాక్టర్ ధనుష్, కింగ్ అక్కినేని నాగార్జున కాంబినేషన్ లో తెరకెక్కుతోన్న క్రేజీ మల్టీస్టారర్ మూవీ ''కుబేర''. నేషనల్ అవార్డ్ విన్నింగ్ డైరెక్టర్ శేఖర్ కమ్ముల దర్శకత్వం వహిస్తున్న ఈ సినిమాలో నేషనల్ క్రష్ రష్మిక మందన్న హీరోయిన్ గా నటిస్తోంది. ఇప్పటికే రిలీజైన ఈ మూవీ పోస్టర్లు, టైటిల్ గ్లింప్స్ కు ఆడియన్స్ నుంచి ట్రెమండస్ రెస్పాన్స్ వచ్చింది. ఈ క్రమంలో తాజాగా సూపర్ స్టార్ మహేష్ బాబు ఈ సినిమా గ్లింప్స్ ను రిలీజ్ చేసి, చిత్ర బృందానికి బెస్ట్ విషెస్ అందజేశారు.

ఒక్క డైలాగు కూడా లేకుండా 52 సెకండ్ల నిడివితో కట్ చేసిన ఈ గ్లింప్స్ 'కుబేర' వరల్డ్ లోకి తీసుకెళ్తుంది. ధనుష్ మురికివాడలలో నిరాడంబరమైన జీవితాన్ని గడుపుతున్న బిచ్చగాడి గెటప్ లో చేతిలో ఒక కుక్క పిల్లను పట్టుకొని నవ్వుతూ కనిపించడంతో ఈ వీడియో ప్రారంభం అవుతుంది. నాగార్జున ఏదో ఆలోచిస్తూ ముంబై బీచ్ లో నడుస్తూ, ఆ తర్వాత తన భార్యా కూతురితో సంతోషంగా గడుపుతూ కనిపించారు. బాలీవుడ్ నటుడు జిమ్ సర్భ్ ఒక బిలియనీర్ బిజినెస్ మ్యాన్ గా కనిపిస్తాడు. అలానే రష్మిక మందన్న మధ్యతరగతి యువతిగా కనిపించింది. చివర్లో ధనుష్ తెల్లని లుంగీ, చొక్కా ధరించి సంప్రదాయమైన లుక్ లో కనిపించడంతో ఈ వీడియో ఎండ్ అవుతుంది.

'కుబేర' గ్లింప్స్ లో ధనుష్, నాగ్, రష్మిక మందన్న, జిమ్ సర్భ్.. ఇలా మెయిన్ క్యారెక్టర్స్ అంతా ఇలా ఒకరి తర్వాత ఒకరు కనిపిస్తూ, పరిస్థితులకు తగ్గట్లుగా ఫేస్ లలో రకరకాల ఎక్స్ ప్రెషన్స్ చూపించారు. అందరూ జీవితంలో ఏదో అసంతృప్తితో పోరాడుతున్నట్లుగా, దేని కోసమో ఆరాటపడుతున్నట్లుగా కనిపించారు. కథేంటనేది రివీల్ చెయ్యకుండా, కథంతా డబ్బు చుట్టూనే తిరుగుతుందని హింట్ ఇస్తూ.. ప్రధాన పాత్రల క్యారక్టర్ ఆర్క్ పై దృష్టి సారించేలా 'కుబేర' గ్లింప్స్ ను కట్ చేసారు శేఖర్ కమ్ముల. సెన్సిబుల్ డైరెక్టర్ గా పేరున్న ఆయన.. ఈసారి మనుషులు, డబ్బుకు మధ్య నడిచే భావోద్వేగాలను తెర మీదకు తీసుకొస్తున్నట్లు అర్థమవుతోంది. తన గత చిత్రాలకు పూర్తి భిన్నమైన జోనర్ లో కమర్షియల్ బ్యాక్‌డ్రాప్‌లో వైవిధ్యమైన కథను చెప్పబోతున్నట్లు ఈ గ్లింప్స్ ను బట్టి తెలుస్తోంది.

'కుబేర' గ్లింప్స్ లో దేవిశ్రీ ప్రసాద్ బ్యాగ్రౌండ్ స్కోర్ హైలైట్ గా నిలిచింది. పాత్రల్లోని ఎమోషన్స్ ను క్యారీ చేసేలా, ఇంటెన్స్ బీజీఎమ్ ను కంపోజ్ చేసారు డీఎస్పీ. ఎలాంటి డైలాగ్స్ లేకపోయినా, తన మ్యూజిక్ తో ఆ లోటు కనిపించకుండా కథలో లీనమయ్యేలా చేసారు. నికేత్ బొమ్మి సినిమాటోగ్రఫీ ప్రధాన ఆకర్షణగా నిలిచింది. ప్రొడక్షన్ వాల్యూస్‌ రిచ్ గా ఉన్నాయి. మొత్తం మీద అద్భుతమైన బ్యాగ్రౌండ్ స్కోర్, డ్రామా, విజువల్స్ కలయికగా వచ్చిన ఈ గ్లింప్స్ సినిమాపై అంచనాలను రెట్టింపు చేస్తోంది. ఎలాంటి కథను చెప్పబోతున్నారో అనే ఆసక్తిని కలిగిస్తోంది.

శ్రీ వెంకటేశ్వర సినిమాస్ LLP (ఆసియన్ గ్రూప్ యూనిట్), అమిగోస్ క్రియేషన్స్ ప్రైవేట్ లిమిటెడ్‌ బ్యానర్స్ పై సునీల్ నారంగ్, పుస్కుర్ రామ్ మోహన్ రావు ఈ చిత్రాన్ని నిర్మిస్తున్నారు. తమిళం, తెలుగు, హిందీలలో రూపొందుతున్న ఈ సినిమాని ఇతర ప్రధాన భాషల్లోనూ విడుదల చేయనున్నారు. రిలీజ్ ఎప్పుడనేది చెప్పలేదు కానీ, ''కుబేర'' మూవీ వచ్చే ఏడాది సమ్మర్ లో ప్రేక్షకుల ముందుకు వచ్చే అవకాశం ఉంది.