మ‌హిళా జ‌ర్న‌లిస్టుపై చెయ్యేసిన హీరో ఆపై..!

అత‌డు మ‌ల‌యాళంలో అగ్రహీరో. సీనియర్ న‌టుడిగా గౌర‌వం అందుకుంటున్నాడు. కానీ ఒక మ‌హిళా జర్నలిస్ట్‌తో అవాంఛనీయ రీతిలో ప్ర‌వ‌ర్తించ‌డం వివాదానికి దారితీసింది. ఇంత‌లోనే అత‌డు స‌ద‌రు మ‌హిళా జ‌ర్న‌లిస్టుకు క్ష‌మాప‌ణ‌లు చెప్పాడు. ప్ర‌స్తుతం ఈ ఎపిసోడ్ పై ప్ర‌జ‌ల్లో చ‌ర్చ సాగుతోంది. ఇంత‌కీ ఎవ‌రా సీనియ‌ర్ న‌టుడు? అంటే .. వివ‌రాల్లోకి వెళ్లాలి.

ప్రముఖ నటుడు, బీజేపీ రాజ్యసభ మాజీ ఎంపీ సురేష్ గోపీ ఓ మహిళా జర్నలిస్టు ప్రశ్నలకు సమాధానమిస్తూ ఆమె భుజంపై రెండుసార్లు చేయి వేశాడు. కోజికోడ్‌లో విలేకరులు త‌న‌ను ప్ర‌శ్నిస్తున్న క్ర‌మంలోనే అత‌డు మీడియా ఎదుట ఇలా ప్ర‌వ‌ర్తించడం ఆశ్చ‌ర్య‌ప‌రిచింది. ఆమె ఇబ్బంది ఫీల‌వుతున్నా అత‌డు రెండోసారి ఆ ప‌ని రిపీట్ చేసాడు. మ‌హిళా జ‌ర్న‌లిస్టు అతడిని ప్ర‌శ్నించ‌గా, ఆమె భుజంపై చేయి వేసి స‌మాధానం ఇచ్చాడు. ఆమె కొంత ఇబ్బందిగా వెనక్కి జ‌రిగి మ‌ళ్లీ మరొక ప్రశ్న అడిగారు. మ‌ళ్లీ అదే రిపీట్. మ‌రోసారి అత‌డు తన చేతిని ఆ జ‌ర్న‌లిస్ట్ భుజంపై వేసాడు. ఆ సమయంలో ఆ మ‌హిళా జ‌ర్న‌లిస్టు ఆ చేతిని దూరంగా నెట్టింది. అందుకు సంబంధించిన వీడియో ఇప్పుడు అంత‌ర్జాలంలో వైర‌ల్ గా మారింది. దీనిపై ప్ర‌తిప‌క్ష నేత‌లు విరుచుకుప‌డుతున్నారు. ప్ర‌వ‌ర్త‌న తెలియ‌ని నాయ‌కుడు అంటూ విమ‌ర్శిస్తున్నారు.

అయితే ఘ‌ట‌న అనంత‌రం సురేగోపి మ‌రునాడే క్షమాపణలు చెప్పారు. అతడు మ‌హిళా జర్నలిస్ట్ ని త‌న సోద‌రి అని పిలిచాడు. ఆమెను మోల్ (కుమార్తె) అని వ్యాఖ్యానించాడు. త‌న‌పై అనురాగంతో మాత్రమే ఆ పని చేశాన‌ని అన్నాడు. అయినా ఆమె భావాలను గౌరవించాలి! అంటూ ఫేస్‌బుక్‌లో పోస్ట్ చేశాడు. నా ప్రవర్తన గురించి ఆమె తప్పుగా భావించి ఉంటే నేను ఆమెకు క్షమాపణలు చెబుతున్నాను.. క్షమించండి.. అని అన్నాడు. స‌ద‌రు జర్నలిస్టు సీనియ‌ర్ న‌టుడి ప్రవర్తనతో బాధపడ్డానని, న్యాయపోరాటానికి దిగుతానని వ్యాఖ్యానించ‌డం చ‌ర్చ‌కు వ‌చ్చింది.