వీడియో: ఈత కొల‌నులో హ‌బ్బీతో మౌని స‌రాగాలు

ఇటీవ‌ల త‌న స్నేహితురాలు దిశా ప‌టానీతో క‌లిసి దుబాయ్ వెకేష‌న్ ని ఎంజాయ్ చేసింది మౌనిరాయ్. ఈ ట్రిప్ లో దిశా- మౌని మ‌ధ్య గొప్ప స్నేహం చూసి కొంద‌రు కుళ్లుకున్నారు. ఇది స్వ‌లింగ‌సంప‌ర్క ప్రేమ‌! అని కామెంట్లు చేసిన‌వారు ఉన్నారు. కానీ ఇప్పుడు త‌న వెకేష‌న్ నుంచి ఒక అరుదైన వీడియోని అభిమానుల కోసం షేర్ చేసింది. ఈ వీడియోలో త‌న భ‌ర్త‌తో క‌లిసి ఈత కొల‌నులో ఎంజాయ్ చేస్తోంది మౌని. హ‌బ్బీతో స‌రాగాలు కుర్ర‌కారు గుండెల్ని ట‌చ్ చేసాయి. మౌనిరాయ్ వెరీ ల‌క్కీ.. త‌న జీవితాన్ని త‌న‌కు న‌చ్చిన‌ట్టుగా ఆస్వాధిస్తోంది. పెళ్ల‌యాకా ఇస్పీడ్ ఎంత‌మాత్రం త‌గ్గ‌లేదు!.. అంటూ కామెంట్ చేస్తున్నారు. ప్ర‌స్తుతం ఈ స్పెషల్ వీడియో అంత‌ర్జాలంలో వైర‌ల్ గా మారింది. ఈ వీడియోకి మౌని ఒక స్పెష‌ల్ కోట్ ని కూడా రాసింది. ``మేల్కొలపండి, కాఫీ, ఈత కొట్టండి, తినండి, మళ్లీ చదవండి ..``అని రాసింది. #ప్రేమ జీవితం అంటూ హ్యాష్ ట్యాగ్ ని జోడించింది.

ఇంత‌కీ ఎవ‌రీ మౌని?

ఒక చిన్న పట్టణం నుండి ముంబైకి మౌని రాయ్ ఆస‌క్తిక‌ర‌ ప్రయాణం గురించి హిందీ మీడియాలో ఎన్నో క‌థ‌నాలొచ్చాయి. ప్రతిభ పట్టుదలతో అనుకున్న‌ది సాధించుకున్న మేటి న‌టీమ‌ణిగా మౌని నిరూపించింది. ఈ బ్యూటీ న‌టిగా హోస్ట్ గాను మ‌న‌సులు గెలుచుకుంది. ఇటీవలి షోలు `సుల్తాన్ ఆఫ్ ఢిల్లీ`లో ప్ర‌త్యేక పాత్ర‌తో..`టెంప్టేషన్ ఐలాండ్`... షోతో హోస్ట్ గా మెరిపించింది. మౌని కేవ‌లం ఒక న‌టిగానే కాదు.. వ్యవస్థాపకురాలిగాను ఎంద‌రికో స్ఫూర్తిగా నిలుస్తోంది. ఆమె రెస్టారెంట్ చైన్ `బద్మాష్`ని ప్రారంభించి దాని 7వ అవుట్‌లెట్‌ను ప్రారంభించింది. ఈ రంగంలో దిన‌దినాభివృద్ధిని సాధిస్తోంది. ఓర్పుతోనే మంచి జరుగుతుందని గుర్తు చేస్తూ కలల్ని నిజం చేసుకుంది మౌని. సినీప‌రిశ్ర‌మ‌లో ఎలాంటి సంబంధాలు లేకుండా తాను క‌న్న క‌ల‌ల్ని నిజం చేసుకున్న ప్ర‌తిభావ‌నిగా మౌని రాయ్ స్ఫూర్తి నింపుతోంది.

న‌ట‌ప్ర‌స్థానం:

ఏక్తా కపూర్ `క్యుంకీ సాస్ భీ కభీ బహు థీ`తో టెలివిజన్ రంగంలోకి ప్రవేశించినప్పటి నుండి మౌని రాయ్ చాలా ఎత్తుకు ఎదిగారు. నాగిన్‌లో నటించిన తర్వాత ఈ బ్యూటీ బాగా పాపుల‌రైంది. మౌని 2018లో అక్షయ్ కుమార్ `గోల్డ్` చిత్రంతో బాలీవుడ్‌లోకి అడుగుపెట్టింది. గత సంవత్సరం అయాన్ ముఖర్జీ భారీ చిత్రం బ్రహ్మాస్త్రలో కనిపించింది. ఇటీవల ఆమె జుబిన్ నౌటియాల్‌తో కలిసి `డోటరా` అనే మ్యూజిక్ వీడియోలో కూడా కనిపించింది. మౌని రాయ్ చివరిసారిగా వెబ్ సిరీస్ `సుల్తాన్ ఆఫ్ ఢిల్లీ`లో కనిపించింది.

ఇటీవలి ఇంటర్వ్యూలో మౌని సుల్తాన్ ఆఫ్ ఢిల్లీ .. బ్రహ్మాస్త్ర వంటి ప్రాజెక్టులు తనలోని న‌టి విష‌య‌మై ప్ర‌జ‌ల‌ అభిప్రాయాన్ని మార్చాయని అంది. `బ్రహ్మాస్త్ర` పూర్తిగా భిన్నమైనది. గోల్డ్, రా .. మేడ్ ఇన్ చైనా లోను విల‌క్ష‌ణ పాత్ర‌ల‌కు మంచి గుర్తింపు ద‌క్కింద‌ని మౌని తెలిపింది.