నాజ‌ర్ కొడుకు 14రోజుల కోమా.. స్పృహలోకి రాగానే చేసిన ప‌ని!

క‌ళ ప్ర‌భావం.. క‌ళాకారుల ప్ర‌భావం గురించి ఎంత చెప్పినా త‌క్కువే. అందుకే ఆర్టిస్టుల‌కు విప‌రీత‌మైన క్రేజ్. వారికి ఉండే గుర్తింపు అసాధార‌ణ‌మైన‌ది. ఒక చిన్న న‌టుడు అయినా సెల్ఫీలు, ఫోటోల కోసం ప్ర‌జ‌లు ఎగ‌బ‌డ‌తారు. అలాంటిది దేశంలోనే అతి పెద్ద స్టార్ల‌లో ఒక‌రిగా గుర్తింపు పొందిన ద‌ళ‌ప‌తి విజ‌య్ ప్రభావం అభిమానుల మైండ్ పై ఎలా ఉంటుందో ఊహించ‌గ‌లం. 14 రోజుల కోమా (అప‌స్మార‌క స్థితి) నుంచి కోలుకుని అప్పుడే క‌ళ్లు తెరిచిన త‌న‌ బిడ్డ ద‌ళ‌ప‌తి విజ‌య్ ని ఎలా త‌లుచుకున్నాడో ప్ర‌ముఖ న‌టుడు నాజ‌ర్ వివ‌రించిన తీరు ఆశ్చ‌ర్య‌ప‌రుస్తోంది.

ఒకానొక స‌మ‌యంలో త‌న‌ కొడుకు 14 రోజులు కోమాలో ఉన్నాడు. చికిత్స కోసం సింగపూర్‌కు తీసుకెళ్లినట్లు నాజ‌ర్ తెలిపారు. నిద్ర లేవగానే అమ్మ (అమ్మ)ను గానీ, నాన్నను గానీ పిలవలేదు. 'విజయ్' అన్నాడు. అతడికి ఈ పేరుతో ఒక స్నేహితుడు (విజ‌య్) ఉన్నాడు. కనీసం అతని జ్ఞాపకశక్తి అయినా బాగుందని మేం సంతోషించాం. కానీ విజ‌య్ అతడిని కలవడానికి వచ్చినప్పుడు నా కొడుకు అతన్ని గుర్తించలేదు. రియాక్ట్ అవ్వకుండా చూస్తూ ఉండిపోయాడు. తన కుటుంబం గందరగోళంలో ఉండగా అతని భార్య (సైకాలజిస్ట్) విజయ్ తన కొడుకు దేని గురించి మాట్లాడుతున్నాడో అర్థం చేసుకుంద‌ని.. నటుడు విజయ్ ఫోటోను అతడికి చూపించామ‌ని నాజ‌ర్ చెప్పాడు. దళపతి విజయ్ ఫోటో చూసి తన కొడుకు ముఖం వెలిగిపోయిందని నాజర్ అన్నారు. దీని తర్వాత అతడి జ్ఞాపకాన్ని తిరిగి తీసుకురావడానికి విజయ్ సినిమాలు, పాటలను పేషెంట్‌కి చూపించాలని నిర్ణయించుకున్నార‌ట‌.

విజయ్ ఆసుపత్రికి వెళ్లి నాజర్ కొడుకును కలిశాడు. ఒకసారి కాదు చాలాసార్లు ఆయన్ను కలిశాడు. చాలా సమయం గడిపేవాడు. బాలుడు గిటార్ వాయించేవాడని తెలుసు కాబట్టి ఒక సంగీత వాయిద్యం కూడా విజ‌య్ బహుమతిగా ఇచ్చాడు. కాబట్టి క‌చ్చితంగా నా జీవితంలో.. నా ఫైజల్ జీవితంలో విజ‌య్ కి చాలా పెద్ద పాత్ర ఉంది అని నాజ‌ర్ అన్నారు. విజయ్ కెరీర్ మ్యాట‌ర్ కి వ‌స్తే... చివరిగా వెంకట్ ప్రభు చిత్రం 'గోట్'లో కనిపించాడు. విజయ్ త్వరలో హెచ్ వినోద్ చిత్రంలో నటించనున్నారు. రాజకీయాల్లో పూర్తి బిజీ అయ్యే ముందు ఇది చివరి విడుదల అవుతుంది.