'స్వయంభూ'.. ఓ పనైపోయింది!

వైవిధ్యభరితమైన కథలను ఎంచుకుంటూ మంచి గుర్తింపు తెచ్చుకున్నాడు టాలీవుడ్ యంగ్‌ హీరో నిఖిల్‌. రీసెంట్​గా 'స్పై' అనే మిస్టరీ థ్రిల్లర్‌తో ప్రేక్షకుల ముందుకు వచ్చిన ఈ హీరో ప్రస్తుతం పలు విభిన్నమైన చిత్రాలను లైన్​లో పెట్టాడు. అందులో భరత్‌ కృష్ణమాచారి దర్శకత్వంలో నటిస్తున్న స్వయంభూ ఒకటి.

పీరియాడిక్​ డ్రామాగా రూపొందుతున్న ఈ సినిమా కోసం.. ఆయుధాలు ఉపయోగించడం, మార్షల్‌ ఆర్ట్స్‌, గుర్రపు స్వారీ నేర్చుకునేందుకు... వియత్నాం వెళ్తున్నట్లు ఆ మధ్యలో నిఖిల్​ చెప్పిన సంగతి తెలిసిందే. నిపుణుల పర్యవేక్షణలో 3 నెలల పాటు శిక్షణ తీసుకోబోతున్నట్లు తెలిపాడు. అయితే తాజాగా వియాత్నంలో మార్షల్ ఆర్ట్స్​ శిక్షణ పూర్తైనట్లు ట్వీట్​ చేశాడు నిఖిల్​.

30 రోజుల పాటు శిక్షణ తీసుకున్నట్లు పేర్కొన్నాడు.అక్కడ నగరంలోని రద్దీ రోడ్లపై దిగిన ఫొటోను షేర్ చేశాడు నిఖిల్​. షూటింగ్​లో మళ్లీ అడుగుపెట్టినట్లు కూడా చెప్పుకొచ్చాడు. ఈ పిక్​లో నిఖిల్​ ఫుల్​ జోష్​లో యమా స్టైలిష్​గా కనిపించాడు. హాఫ్ హ్యాండ్ డిజైన్డ్​ షర్ట్​, బ్లాక్ ఫ్యాంట్​ ధరించి సైడ్​ పోజు ఇచ్చాడు. ఇది అభిమానులను ఆకట్టుకుంటోంది.

కాగా, ఆ మధ్యలో స్వయంభు సినిమాకు సంబంధించిన పోస్టర్‌ను విడుదల చేయగా అది నెటిజన్లను, సినీ ప్రియులను బాగా ఆకట్టుకుంది. సోషియో ఫాంటసీ చిత్రంగా తెరకెక్కుతున్న ఈ చిత్రంలో నిఖిల్ సరసన సంయుక్త మేనన్‌ నటిస్తోంది. నిఖిల్‌ కెరీర్‌లోనే అత్యంత భారీ బడ్జెట్‌ చిత్రంగా ఈ చిత్రం తెరకెక్కనుంది.

ఠాగూర్ మధు సమర్పణలో భువన్‌, శ్రీకర్‌ సంయుక్తంగా సినిమాను నిర్మిస్తున్నారు. కేజీఎఫ్ ఫేం రవి బసుర్ మ్యూజిక్ అందిస్తున్నారు. బింబిసార ఫేం వాసుదేవ్ మున్నెప్పగిరి డైలాగ్స్ అందిస్తున్నారు. మనోజ్‌ పరమహంస ఛాయాగ్రాహకుడిగా వ్యవహరిస్తున్నారు.

ఈ చిత్రంతో ఎలాగైనా గట్టి హిట్ అందుకోవాల‌ని నిఖిల్ పట్టుదలతో ఉన్నారు. ఇక ఈ చిత్రంతో పాటు సుధీర్‌ వర్మతోనూ నిఖిల్‌ ఓ సినిమా చేస్తున్నారు. రామ్‌ చరణ్‌ సమర్పణలో ది ఇండియా హౌస్‌ పేరిట ఇది రూపుదిద్దుకోనుంది. అలాగే చందు మొండేటితో 'కార్తికేయ‌-3'కి కూడా రెడీ అవుతున్నారు నిఖిల్.