`సెల్పిష్` లో నితిన్ గెస్ట్?

యూత్ స్టార్ నితిన్ కి స‌రైన స‌క్సెస్ ప‌డి చాలా కాల‌మ‌వుతోంది. `భీష్మ` త‌ర్వాత వ‌రుస‌గా ప‌రాజ‌యాలు ఇబ్బంది పెడుతున్నాయి. భారీ అంచ‌నాల మ‌ధ్య రిలీజ్ అయిన సినిమాల‌న్నీ వాటిని అందుకోవడంలో విఫ‌ల‌మ‌వుతున్నాయి. అయినా జోరు మాత్రం త‌గ్గ‌లేదు. ఒక‌దాని వెంట ఒక‌టి చేస్తూనే ఉన్నాడు. ఇప్ప‌టికే రెండు సినిమాలు చేస్తున్నాడు. తాజాగా వేణు శ్రీరామ్ ద‌ర్శ‌క‌త్వంలో `త‌మ్ముడు` టైటిల్ తో ఓ సినిమా నేడు ప్రారంభించిన సంగ‌తి తెలిసిందే.

ఇప్ప‌టివ‌ర‌కూ ప‌వ‌న్ అభిమానిగా చెప్పుకున్న నితిన్ ఇప్పుడు ఏకంగా పీకే టైటిల్ తోనే మార్కెట్ లోకి రావ‌డానికి రెడీ అయ్యాడు. ఈ సినిమాని దిల్ రాజు నిర్మాణ సంస్థ శ్రీవెంక‌టేశ్వ‌రా క్రియేష‌న్స్ నిర్మిస్తుంది. ఈ నేప‌థ్యంలో నితిన్ మ‌రోసారి గెస్ట్ అపిరియ‌న్స్ ఇవ్వ‌డానికి రెడీ అవుతున్నట్లు లీకైంది. ప్ర‌స్తుతం దిల్ రాజు త‌మ్ముడు కుమారుడు అశిష్ హీరోగా `సెల్పీష్` అనే సినిమా తెర‌కెక్కుతోన్న సంగ‌తి తెలిసిందే.

ఈ సినిమాలో నితిన్ ఓ గెస్ట్ రోల్ పోషిస్తున్న‌ట్లు స‌మాచారం. సినిమాలో ఓ ముఖ్య‌మైన స‌న్నివేశంలో నితిన్ క‌నిపించ‌నున్నాడుట‌. అదో ప‌బ్లిక్ మీట్ లో భాగంగా వ‌చ్చే సీన్ అట‌. హీరో పాత్ర‌కి రెండు..మూడు సందేశా లు బ‌లంగా ఇచ్చి వెళ్లే సీన్ అంటున్నారు. మ‌రి ఇందులో నిజ‌మెంతో తెలియాలి. నితిన్ ఇలా గెస్ట్ అప్పిరియ‌న్స్ ఇవ్వ‌డం రెండ‌వ‌సారి. వ‌రుణ్ తేజ్ క‌థానాయ‌కుడిగా న‌టించిన `గ‌ద్ద‌ల కొండ గ‌ణేష్` లో కామియో పోషించిన సంగ‌తి తెలిసిందే.

అంత‌కు ముందు గానీ.. ఆ త‌ర్వాత గానీ మ‌ళ్లీ ఎలాంటి అతిధి పాత్ర‌లు చేయ‌లేదు. మ‌ళ్లీ ఇప్పుడు దిల్ రాజు కోసం సెల్పీష్ లో షురూ చేసిన‌ట్లు తెలుస్తోంది. అయితే ఈవిష‌యాన్ని మేక‌ర్స్ క‌న్ప‌మ్ చేయాల్సి ఉంది. దిల్ రాజు-నితిన్ బాండింగ్ తెలిసిందే. నితిన్ హీరోగా న‌టించిన సినిమా `దిల్` తోనే రాజు నిర్మాత అయ్యారు. ఆ త‌ర్వాత చాలా కాలం సినిమాలు చేయ‌లేదు. 2018 లో `శ్రీనివాస క‌ళ్యాణం` క‌లిసి చేసారు.