ఎన్టీఆర్ నీల్.. అంతా సెట్టయ్యింది కానీ..

యంగ్ టైగర్ ఎన్టీఆర్, స్టార్ డైరెక్టర్ ప్రశాంత్ నీల్ కాంబినేషన్‌లో తెరకెక్కనున్న భారీ ప్రాజెక్ట్‌పై ఇప్పటికే భారీ అంచనాలు నెలకొన్నాయి. కెజిఎఫ్, సలార్ వంటి బ్లాక్‌బస్టర్‌ల తర్వాత ప్రశాంత్ నీల్ తెరకెక్కించబోయే ఈ మాస్ యాక్షన్ ఎంటర్టైనర్‌పై దేశవ్యాప్తంగా ఆసక్తి నెలకొంది. ప్రాజెక్ట్‌ను అధికారికంగా ప్రకటించినప్పటి నుంచి, సినిమాకు సంబంధించిన ప్రతి చిన్న లీక్ ఫ్యాన్స్‌ను ఎంతగానో ఎట్రాక్ట్ చేస్తోంది.

ఈ సినిమాను 2026 జనవరి 9న విడుదల చేయాలని మేకర్స్ మొదట అనుకున్నప్పటికీ, ప్రస్తుత పరిస్థితులను చూస్తే సంక్రాంతి రిలీజ్‌కి అవకాశాలు తక్కువగా కనిపిస్తున్నాయి. ఎన్టీఆర్ ప్రస్తుతం బాలీవుడ్‌లో హృతిక్ రోషన్‌తో కలిసి వార్ 2 షూటింగ్‌లో బిజీగా ఉన్నారు. మరోవైపు, ఎన్టీఆర్ నీల్ చిత్రానికి సంబంధించిన ప్రీ-ప్రొడక్షన్ పనులు ఇంకా పూర్తయ్యే దశలో ఉన్నాయి. తాజా సమాచారం ప్రకారం, ఈ సినిమా షూటింగ్ ఫిబ్రవరిలో ప్రారంభం కానుంది.

సినిమా చిత్రీకరణను ఫిబ్రవరి నుంచి ప్రారంభించి, అక్టోబర్ లేదా నవంబర్‌లో పూర్తిచేయాలని ప్లాన్ చేస్తున్నారు. కానీ ప్రశాంత్ నీల్ సినిమాలకు ఎక్కువ సమయం తీసుకునే దర్శకుడనే సంగతి తెలిసిందే. గత చిత్రాల అనుభవాన్ని పరిశీలిస్తే, ప్రొడక్షన్ పూర్తవడానికి మరో 10-12 నెలలు పట్టే అవకాశం ఉంది. అందుకే, సంక్రాంతి 2026కి ఈ ప్రాజెక్ట్ రావడం కష్టమేనని సినీ వర్గాలు అంచనా వేస్తున్నాయి.

ఇప్పటికే చిత్రబృందం భారీ స్థాయిలో ప్రీ-ప్రొడక్షన్ పనులను మొదలుపెట్టింది. ప్రస్తుతం బెంగళూరు పరిసర ప్రాంతాల్లో షూటింగ్ కోసం పలు లొకేషన్లను పరిశీలిస్తున్నారు. సాంకేతిక నిపుణుల ఎంపిక కూడా పూర్తయింది. స్టంట్ మాస్టర్‌గా చేతన్ డిసౌజాను, ఎడిటర్‌గా ఉజ్వల్ కులకర్ణిని, ఆర్ట్ డైరెక్టర్‌గా టిఎల్ వెంకట చలపతిని చిత్రబృందం ఫైనల్ చేసింది. అలాగే ఈ చిత్రంలో మలయాళ స్టార్ టోవినో థామస్, బిజు మీనన్‌లు కీలక పాత్రల్లో కనిపించనున్నారు.

సంగీత దర్శకుడిగా రవి బస్రూర్, సినిమాటోగ్రాఫర్‌గా భువన్ గౌడ పనిచేయనున్నారు. రుక్మిణి వసంత్ కథానాయికగా నటించనున్నారు. భారీ బడ్జెట్‌తో మైత్రీ మూవీ మేకర్స్ నిర్మిస్తున్న ఈ ప్రాజెక్ట్, దేశవ్యాప్తంగా పాన్ ఇండియా లెవెల్లో మాస్ యాక్షన్ సినిమాల స్టాండర్డ్స్‌ను మార్చేలా ఉంటుందని సమాచారం. ప్రస్తుతం ఎన్టీఆర్ నీల్ సినిమా షూటింగ్ మొదలయ్యే తేదీపై క్లారిటీ వచ్చింది. కానీ, సినిమా స్కేల్, ప్రశాంత్ నీల్ టేకింగ్, పోస్ట్ ప్రొడక్షన్ పనులను దృష్టిలో ఉంచుకుంటే సంక్రాంతి 2026కి రావడం కష్టమే. అయితే మేకర్స్ త్వరలో అధికారికంగా కొత్త విడుదల తేదీపై స్పష్టతనిస్తారని భావిస్తున్నారు. మరి ఎన్టీఆర్, ప్రశాంత్ నీల్ మొదటి కాంబో మార్కెట్ లో ఎలాంటి డీల్స్ ను అందుకుంటుందో చూడాలి.