'రాబిన్‌హుడ్' టీజర్.. హై-ఫై ఇళ్లను టార్గెట్ చేసే హనీసింగ్!

యంగ్ హీరో నితిన్, డైరెక్టర్ వెంకీ కుడుముల కాంబినేషన్ లో తెర‌కెక్కుతున్న యూనిక్ యాక్షన్ అండ్ హీస్ట్ కామెడీ ''రాబిన్‌హుడ్‌''. 'భీష్మ' వంటి బ్లాక్‌బస్టర్ తర్వాత వీరిద్దరూ కలిసి చేస్తున్న ఈ సినిమాపై అందరిలో మంచి అంచనాలే ఉన్నాయి. ఇందులో యంగ్ బ్యూటీ శ్రీలీల హీరోయిన్ గా నటిస్తోంది. ఆల్రెడీ ఈ సినిమా నుంచి వచ్చిన క్యారెక్టర్‌ పోస్టర్లు, గ్లింప్స్‌కి అద్భుతమైన రెస్పాన్స్ వచ్చింది. వచ్చే నెలలో ప్రేక్షకుల ముందుకు రాబోతున్న ఈ మూవీ టీజర్ ను మేకర్స్ తాజాగా విడుదల చేసారు.

''ఆగని హై-ఫై ఇళ్లల్లో చోరీలు.. ఇంతమంది దాచుకున్న హనీని దోచుకుపోతున్న హనీ సింగ్ ఎవరు?'' అంటూ న్యూస్ రీడర్స్ స్టైల్ చెప్పే పవర్ ఫుల్ వాయిస్‌ ఓవర్‌తో ఈ టీజర్ ప్రారంభమైంది. హై-ఫై ఇళ్లను టార్గెట్ గా చేసుకుని, రకరకాల వేషాలు వేసుకొని దోపిడీలు చేసే మోడరన్ రాబిన్‌హుడ్‌గా నితిన్ పరిచయం చేయబడ్డాడు. అతన్ని పట్టుకోడానికి ప్రయత్నించే పోలీస్ ఆఫీసర్ గా మలయాళ నటుడు షైన్ టామ్ చాకో కనిపించారు.

''రాబిన్‌ హుడ్‌ కి పర్టిక్యులర్ జెండా అజెండాలు ఏమీ లేవు.. డబ్బు కోసం వాడు ఎవడికైనా ఎదురెళ్తాడు'' అంటూ నితిన్ పాత్ర స్వభావాన్ని వెల్లడించారు. అతను ధనవంతురాలైన, పవర్ ఫుల్ ఫ్యామిలీ బ్యాగ్రౌండ్ ఉన్న శ్రీలీలను చూసి ప్రేమలో పడతాడు. అయితే శ్రీలీలను చూసి నితిన్ ఎగ్జైట్ అవుతున్నాడు కానీ, ఆమె కుటుంబంలో ప్రమాదకరమైన విలన్స్ ఉన్నట్లు తెలుస్తోంది. రాబరీలు చేసుకునే రాబిన్ హుడ్‌ జీవితం, ప్రేమలో పడిన తర్వాత మరింత ప్రమాదకరంగా మారినట్లు టీజర్ లో చూపించారు.

నితిన్ రాబిన్‌హుడ్‌ పాత్రలో, విభిన్నమైన లుక్స్ లో డైనమిక్ పెర్ఫార్మెన్స్ అందించాడు. ఓవైపు దోపిడీలు చేస్తూనే, మరోవైపు ''ఆల్ ఇండియన్స్ ఆర్ మై బ్రదర్స్ అండ్ సిస్టర్స్.. నా కంట్రీకి వచ్చి నా ఫ్యామిలీనే ఇబ్బంది పెడతార్రా.. యూ బ్లడీ ఫారినర్స్'' అంటూ రౌడీలను చితక్కొడుతూ దేశభక్తిని చూపిస్తున్నాడు. చివర్లో అరబ్ షేక్‌గా కనిపించి ఆకట్టుకున్నాడు. అరబ్ షేక్‌ గెటప్ లో ఎందుకు ఉన్నావని పోలీసులు ప్రశ్నిస్తే, పంజాబీ అయితేనే పంజాబీ డ్రెస్ వేసుకోవాలా? అంటూ నితిన్ లాజిక్స్ మాట్లాడటం నవ్వు తెప్పిస్తుంది.

అడ్వెంచర్, యాక్షన్, ఎంటర్టైన్మెంట్, థ్రిల్లింగ్ ఎలిమెంట్స్ కలబోసి దర్శకుడు వెంకీ కుడుముల ఈ చిత్రాన్ని రూపొందిస్తున్నట్లు టీజర్ తోనే క్లారిటీ ఇచ్చాడు.. ప్రమోషన్ మెటీరియల్‌ తోనే సినిమాపై ఆసక్తిని కలిగించాడు. దీంట్లో శ్రీలీల డబ్బున్న అహంకారి మహిళ పాత్ర పోషించింది. టీజర్ లో ఎంతో అందంగా కనిపించింది. రాజేంద్రప్రసాద్, వెన్నెల కిషోర్, మైమ్ గోపీ పాత్రలను కూడా పరిచయం చేసారు. అయితే శ్రీలీల వెనకున్న ఆ విలన్ ఎవరనేది రివీల్ చెయ్యలేదు.

జివి ప్రకాష్ కుమార్ బ్యాక్ గ్రౌండ్ స్కోర్‌, సాయి శ్రీరామ్ కెమెరా వర్క్ ప్రధాన ఆకర్షణగా నిలిచాయి. ప్రొడక్షన్ వాల్యూస్ రిచ్ గా ఉన్నాయి. ఈ చిత్రానికి కోటి ఎడిటర్ గా, రామ్ కుమార్ ఆర్ట్ డైరెక్టర్ గా వ్యవహరిస్తున్నారు. రామ్-లక్ష్మణ్, రవివర్మ, వికారం మోర్ మాస్టర్స్ ఈ సినిమాలో యాక్షన్ కొరియోగ్రఫీ చేసారు. మైత్రీ మూవీ మేకర్స్ బ్యానర్ పై నవీన్ యెర్నేని, వై రవిశంకర్ ఈ చిత్రాన్ని భారీ బడ్జెట్ తో నిర్మిస్తున్నారు. 'రాబిన్‌ హుడ్‌' మూవీని క్రిస్మస్ కానుకగా డిసెంబర్ 20న రిలీజ్ చెయ్యాలని భావించారు. కానీ ఇప్పుడు 'పుష్ప 2' లాంగ్ రన్ కోసం డిసెంబర్ 25న విడుదల చేయాలనే నిర్ణయానికి వచ్చినట్లు తెలుస్తోంది.