ట్రెండీ స్టోరి: స్టార్ల‌ క్యూట్ కిడ్స్ ఎదిగేస్తున్నారుగా..!

దక్షిణాది టాప్ స్టార్లు సినిమాల్లో తమ అసాధారణమైన నటనతో హృదయాలను గెలుచుకుంటున్నారు. స‌ద‌రు స్టార్లు మాత్ర‌మే కాదు, వారి పిల్లలు కూడా తక్కువ సమయంలోనే లైమ్‌లైట్ లోకి వ‌స్తూ అపార‌మైన‌ కీర్తిని పొందుతున్నారు. స్టార్ కిడ్స్ వారి క్యూట్ లుక్స్ .. తెలివితేట‌లు, మ‌నోహ‌ర‌మైన‌ వ్యక్తిత్వాలతో అభిమానులను విస్మయానికి గురిచేస్తున్నారు. ఐకాన్ స్టార్ అల్లు అర్జున్, సూప‌ర్ స్టార్ మ‌హేష్, రాకింగ్ స్టార్ యష్, ప‌వ‌ర్ స్టార్ ప‌వ‌న్ క‌ల్యాణ్, త‌మిళ స్టార్ సూర్య‌ స‌హా ప‌లువురి వార‌సులు నిరంత‌రం ఇంట‌ర్నెట్ ని షేక్ చేస్తున్నారు.

టాలీవుడ్ అగ్ర క‌థానాయ‌కుడు మహేష్ బాబు - నమ్రత శిరోద్కర్ జంట‌కు ముచ్చ‌ట‌గా ఇద్ద‌రు పిల్లలు. కుమార్తె సితార ఘట్టమనేని .. కుమారుడు గౌతమ్ ఘట్టమనేని ఇప్ప‌టికే అంత‌ర్జాలంలో పాపుల‌ర్ కిడ్స్. మహేష్ -నమ్రత వీలున్న ప్ర‌తి వేదిక‌పైనా తమ పిల్లల ఫోటోలను షేర్ చేస్తున్నారు. ఇన్ స్టా, ట్విట్ట‌ర్ స‌హా ఇత‌ర‌ సోషల్ మీడియాల్లో స‌ద‌రు స్టార్ కిడ్స్ ఫోటోలు వైర‌ల్ అవుతున్నాయి. చాలా ఫోటోషూట్ల‌లో క్యూట్‌నెస్ ఓవ‌ర్ లోడెడ్ అని అభిమానులు ప్రేమ‌ను కురిపిస్తున్నారు. ఇక వీలున్న ప్ర‌తిసారీ త‌న పిల్ల‌లు భార్య‌తో క‌లిసి మ‌హేష్ వెకేష‌న్స్ కి వెళుతుంటారు. స్పాట్ నుంచి న‌మ్ర‌త త‌మ పిల్ల‌ల ఫోటోల‌ను షేర్ చేస్తుంటారు. వీటిలో సితార‌, గౌత‌మ్ ల క్యూట్ నెస్ చాలాసార్లు ఎంతో ఆక‌ర్షించాయి.

న‌వ‌ర‌స‌న‌ట‌సార్వ‌భౌముడు, అన్న‌గారు ఎన్టీఆర్ కి సిస‌లైన వార‌సుడిగా జూ.ఎన్టీఆర్ పేరు మార్మోగుతోంది.

యంగ్ టైగ‌ర్ ఎన్టీఆర్ కి ఇద్దరు కుమారులు. నందమూరి అభయ్ రామ్ - నందమూరి భార్గవ్ రామ్.. ఆ ఇద్ద‌రూ కూడా ఎన్టీఆర్ లెగ‌సీని ముందుకు న‌డిపిస్తార‌ని ఫ్యాన్స్ భావిస్తున్నారు. అభ‌య్, భార్గ‌వ్ చూస్తుండ‌గానే వేగంగా ఎదిగేస్తున్నారు. ఎన్టీఆర్ తరచుగా తన భార్య‌ పిల్లలతో పర్యటనల నుండి ఫోటోల‌ను షేర్ చేస్తుంటారు. ఈ ఫోటోలు ఇంట‌ర్నెట్ లో జోరుగా వైర‌ల్ అవుతుంటాయి. ఎన్టీఆర్ వార‌సులు భ‌విష్య‌త్ ప‌రిశ్ర‌మ‌ను ఏలే టాప్ స్టార్లు అవుతార‌ని ఇప్ప‌టికే అభిమానులు అంచ‌నా వేస్తున్నారు.

అల్లు అర్జున్ పుష్ప‌2తో మ‌రోసారి అభిమానులను ఉత్తేజపరిచేందుకు సిద్ధంగా ఉన్నాడు. బ‌న్ని త‌ర‌చుగా వెకేష‌న్ హాలిడేస్ ని ఎంజాయ్ చేసేందుకు ఇష్ట‌ప‌డ‌తాడు. పిల్లలు అల్లు అయాన్ .. అల్లు అర్హా భార్య స్నేహ‌తో క‌లిసి నిరంత‌ర విహార యాత్ర‌లకు ప్లాన్ చేస్తుంటాడు. ఇక వెకేష‌న్ నుంచి ప్ర‌తి అంద‌మైన ఫోటోని బ‌న్ని షేర్ చేస్తుంటారు. అవి అభిమానుల్లో జోరుగా వైర‌ల్ అవుతుంటాయి. అల్లు అర్జున్ తన వార‌సుల‌ను న‌ట‌రంగంలో తీర్చిదిద్దేందుకు ఇప్ప‌టి నుంచే పెద్ద ప్ర‌ణాళిక‌తో ఉన్నారు. ఇప్ప‌టికే అల్లు అర్హ న‌టిగా ఆరంగేట్రం చేసింది. క్యూట్ లుక్స్ తో అల్ల‌రి చేయ‌డంలో అర్హ‌ను మించిన వారే లేరు. ఇక అయాన్ ఎంతో రిజ‌ర్వ్ డ్ గా ఉంటాడు. ఈ క్యూట్ కిడ్స్ ఫోటోల‌కు వెబ్ లో గొప్ప స్పంద‌న‌లు వ్య‌క్త‌మ‌వుతుంటాయి.

ప‌వ‌ర్ స్టార్ ప‌వ‌న్ క‌ల్యాణ్ వార‌సుల్లో అకీరా నంద‌న్, ఆద్య ఇరువురు సోష‌ల్ మీడియాల్లో అభిమానుల‌కు ట‌చ్ లో ఉన్నారు. అకీరా తొంద‌ర్లోనే న‌ట‌న‌లోకి ఎంట్రీ ఇస్తాడ‌ని ప్ర‌చార‌మ‌వుతోంది. ప్ర‌స్తుతం అత‌డు విదేశాల్లో న‌ట‌శిక్ష‌ణ పొందుతున్నాడు. అకీరా నంద‌న్ ప‌వ‌న రెండో భార్య రేణు దేశాయ్ గారాల పుత్రుడు అన్న సంగ‌తి తెలిసిందే. అకీరా, ఆద్య ఇప్పుడు క్యూట్ కిడ్స్ కాదు. టీనేజీ లో ప్ర‌వేశించారు. వారి ఫోటోలు ఇప్ప‌టికే అంత‌ర్జాలంలో వైర‌ల్ అయ్యాయి.

KGF స్టార్ యష్ కూతురు ఐరా .. కొడుకు యథార్వ్ నిరంత‌రం సోష‌ల్ మీడియాల్లో ప్ర‌త్య‌క్ష‌మ‌వుతున్నారు. యష్ తన తీవ్రమైన షెడ్యూళ్ల‌ను ముగించి, తన కుటుంబం చిన్న పిల్లలతో గడపడానికి ఎక్కువ‌ సమయాన్ని వెచ్చిస్తాడు. అందుకు సంబంధించిన ఫోటోల‌ను య‌ష్ నిరంత‌రం షేర్ చేస్తుంటే అవి అభిమానుల్లో వైర‌ల్ గా మారుతున్నాయి.

త‌మిళ టాప్ హీరో సూర్య 2006లో స‌హ‌నటి జ్యోతికను వివాహం చేసుకున్నారు. వీరికి కుమార్తె దియా, కుమారుడు దేవ్ ఉన్నారు. సూర్య నిరంత‌రం త‌మ పిల్ల‌ల‌తో విహార‌యాత్ర‌ల‌ను ఆస్వాధిస్తారు. సామాజిక సేవా కార్య‌క‌లాపాల‌తోను సూర్య‌- జ్యోతిక ఇప్ప‌టికే ఎంతో మంచి పేరు తెచ్చుకున్నారు.

నయనతారకు స‌రోగ‌సీలో కవల మగ పిల్లలు జ‌న్మించిన సంగ‌తి తెలిసిందే. ఉయిర్ రుద్రోనీల్ ఎన్ శివన్ - ఉలాగ్ దైవిక్ ఎన్ శివన్. తన శిశువులకు సంబంధించిన కొన్ని అందమైన ఫోటోలను న‌య‌న్ ఇప్ప‌టికే షేర్ చేసింది. ఇటీవ‌లే జ‌న్మాష్ఠ‌మి రోజున పంచె క‌ట్టుతో ఇద్ద‌రు క్యూట్ కిడ్స్ ఫోటోల‌ను షేర్ చేసింది. పిల్ల‌ల‌ క్యూట్ లుక్స్ ఫ్యాన్స్ హృదయాలను గెలుచుకున్నాయి.

మాలీవుడ్ యువ‌హీరో దుల్కర్ సల్మాన్ కుమార్తె మరియం అమీరా సల్మాన్ ఫోటోలు ఇంత‌కుముందే అంత‌ర్జాలంలో వైర‌ల్ అయ్యాయి. కూతురుతో దుల్కార్ ఘాడ‌మైన అనుబంధం ఎప్ప‌టికీ మ‌రువ‌లేనిది. దుల్క‌ర్ కుమార్తె అందమైన చిరునవ్వు ప్రేమలో పడేలా చేస్తుంది.

సౌత్ స్టార్ హీరోయిన్ కాజల్ అగర్వాల్ కొడుకు నీల్ ఫోటోలు అంత‌ర్జాలంలో వైర‌ల్ అయ్యాయి. నీల్ తో అందమైన ఫోటోలను కాజ‌ల్ నిరంత‌రం తన సోషల్ మీడియాలో పంచుకుంటూ ఉంటుంది. నీల్ తన తల్లిలా కనిపిస్తున్నాడనే కాంప్లిమెంట్లు అందుకున్నాడు.

నేటి కిడ్స్ రేప‌టి పౌరులు. వీరంతా భావి భార‌త స్టార్లుగా ఏల్తార‌న‌డంలో సందేహం లేదు. ముఖ్యంగా న‌టీన‌టుల‌ వార‌సులు కూడా న‌ట‌రంగంలోనే ఎదిగేందుకు ఆస‌క్తిగా ఉంటారు. అయితే ఇందులో ఎవ‌రు సూప‌ర్ స్టార్‌డ‌మ్ సంపాదిస్తారు? అనేది ఇప్పుడే చెప్ప‌లేం. కొన్నిటికి కాల‌మే స‌మాధానం చెబుతుంది. నేటి చిన్నారులు పాన్ ఇండియా ఎరాలో ఎదిగేస్తున్నారు. అందుకే వీరికి సినీరంగంలో ప్ర‌య‌త్నిస్తే భ‌విష్య‌త్ కూడా అంతే భారీత‌నంతో గ్రాండియ‌ర్ గా ఉంటుంద‌న‌డంలో సందేహం లేదు.