సూపర్ హీరో సూర్య.. నయా యాంగిల్ లో క్రేజీ ప్రాజెక్ట్?

తమిళ స్టార్ హీరో సూర్య మరోసారి తన సినిమాల ఎంపికతో చర్చనీయాంశమవుతున్నారు. తన సినిమాలకు ప్రతిసారి కొత్తదనాన్ని తేవడంలో సిద్ధహస్తుడైన సూర్య, ఇప్పుడు క్రేజీ ప్రాజెక్టులతో ప్రేక్షకులను ఆకర్షించేందుకు సిద్ధమయ్యారు. ఇటీవల విడుదలైన కంగువా ఆశించిన స్థాయిలో విజయాన్ని అందుకోలేకపోయినప్పటికీ, తదుపరి ప్రాజెక్టులపై ఉన్న ఆసక్తి మాత్రం తగ్గలేదు. ముఖ్యంగా దర్శకుడు కార్తీక్ సుబ్బరాజ్‌తో చేస్తున్న రెట్రో అనే చిత్రంపై భారీ హైప్ నెలకొంది.

ఇంతలో, సూర్య మరో సరికొత్త ప్రయోగానికి శ్రీకారం చుట్టబోతున్నారనే టాక్ ఇండస్ట్రీలో వినిపిస్తోంది. ఆయన ఒక సూపర్ హీరోగా కనిపించబోతున్నారన్న వార్త ఇప్పుడు కోలీవుడ్‌లో హాట్ టాపిక్‌గా మారింది. ఈ ప్రాజెక్ట్‌ కు మళయాళం సినిమాల ఫేమస్ దర్శకుడు బాసిల్ జోసెఫ్‌ దర్శకత్వం వహించనున్నారని సమాచారం. మిన్నల్ మురళి వంటి సూపర్ హీరో చిత్రాన్ని అందించిన బాసిల్ జోసెఫ్, తన స్టైల్‌లో మరింత డిఫరెంట్ ప్లాన్ తో రెడీ అవుతున్నాడు.

ఈ సినిమా కూడా సూపర్ హీరో కాన్సెప్ట్‌తోనే ఉండబోతోందన్న ఊహాగానాలు వినిపిస్తున్నాయి. సూర్య ఇలాంటి పాత్రలకు పర్ఫెక్ట్ యాక్టర్ అని చెప్పవచ్చు. పాత్రల కోసం అతను తన ఫిట్నెస్ ను మార్చుకున్న సందర్భాలు చాలానే ఉన్నాయి. ఇక లుక్స్ తో కూడా షాక్ ఇవ్వగలడు. దర్శకుడి పనితనం బాగుంటే అతని చరిష్మా సినిమాను మరో లెవెల్ కు తీసుకు వెళ్ల గలదు.

మిన్నల్ మురళితో బాసిల్ జోసెఫ్ సూపర్ హీరో సినిమాలకు కొత్త కోణాన్ని చూపించారు. ఇప్పుడు, సూర్యతో కలిసి మరింత గ్రాండ్‌గా, ఇంటర్నేషనల్ స్టాండర్డ్స్‌లో సినిమా చేయాలని బాసిల్ ప్రణాళికలు సిద్ధం చేస్తున్నట్టు తెలుస్తోంది. సూర్య ఇప్పటికే విభిన్న పాత్రలతో ప్రేక్షకుల మన్ననలు పొందిన నటుడు. గతంలో ఘజినీ, సేవన్త్ సీన్స్, సూరరై పొట్రు వంటి సినిమాల్లో సూర్య నటనకు ఆడియన్స్ ఫిదా అయిపోయారు. ఇప్పుడు సూపర్ హీరోగా సూర్య కనిపిస్తే అది కేవలం తమిళ సినీ పరిశ్రమకే కాకుండా పాన్ ఇండియా స్థాయిలో కొత్త ప్రయోగంగా నిలుస్తుందని చెప్పొచ్చు.

ఈ చిత్రం కూడా తెలుగు, హిందీ, ఇతర భాషల్లో డబ్ చేసి రిలీజ్ చేసే అవకాశం ఉంది. ఈ క్రేజీ ప్రాజెక్ట్‌పై అధికారిక ప్రకటన రాలేదు గానీ, ఇండస్ట్రీలో టాక్ మాత్రం తారాస్థాయిలో ఉంది. ప్రస్తుతం కథను పూర్తి చేయడానికి బాసిల్ స్క్రిప్ట్ వర్క్‌లో ఉన్నట్టు తెలుస్తోంది. ఈ చిత్రం విజువల్ గ్రాండియర్‌తో పాటు, సూపర్ హీరో కాన్సెప్ట్‌ను కొత్త కోణంలో ఆవిష్కరించే అవకాశం ఉందని సినీ వర్గాలు చెబుతున్నాయి. మరి ఈ ప్రాజెక్ట్ నిజంగా సూర్య కెరీర్‌లో భారీ విజయాన్ని అందిస్తుందో లేదో చూడాలి.