పరోటా మాస్టర్ గా స్టార్ హీరో..!

తమిళ్‌ తో పాటు తెలుగు, హిందీ ఇంకా ఇతర భాషల్లో వరుసగా సినిమాలు చేస్తున్న స్టార్‌ నటుడు విజయ్ సేతుపతి. తమిళ్ లో ఈయన హీరోగా నటిస్తూ మరోవైపు ఇతర భాషల్లో క్యారెక్టర్ ఆర్టిస్టుగా చేయడం తెల్సిందే. ఇటీవల విజయ్‌ సేతుపతి నటింఇన మహారాజా ఎంతటి విజయాన్ని సొంతం చేసుకుందో ప్రత్యేకంగా చెప్పనక్కర్లేదు. నెట్‌ ఫ్లిక్స్ లో ఈ సినిమాకి అరుదైన రికార్డ్‌ దక్కింది. ఆ సినిమా గురించి ఇంకా సోషల్‌ మీడియాలో చర్చ జరుగుతూనే ఉండగా తాజాగా కొత్త సినిమాకు సైన్ చేయడంతో పాటు, షూటింగ్ లో కూడా జాయిన్‌ అయ్యాడు.

ప్రముఖ దర్శకుడు పాండిరాజ్ దర్శకత్వంలో విజయ్ సేతుపతి ముఖ్య పాత్రలో ఒక సినిమా రూపొందుతోంది. ఆగస్టు 20వ తారీకున ఈ సినిమా రెగ్యులర్‌ షూటింగ్‌ ప్రారంభం అయ్యింది. విజయ్‌ సేతుపతికి జోడీగా ఈ సినిమాలో నిత్యా మీనన్ నటిస్తోంది. వీరిద్దరి కాంబో మూవీ పైగా పాండిరాజ్ దర్శకత్వంలో సినిమా అవ్వడంతో అంచనాలు ఆకాశాన్ని తాకేలా ఉన్నాయి. అంచనాలకు తగ్గట్లుగా విజయ్ సేతుపతి ఫ్యాన్స్ అంతా కూడా సర్‌ప్రైజ్‌ అయ్యే విధంగా ఈ సినిమాను దర్శకుడు పాండిరాజ్ రూపొందిస్తున్నాడని చిత్ర యూనిట్‌ సభ్యులు చెబుతున్నారు.

సాధారణంగా మన తెలుగు హీరోల నేచురాలిటీకి చాలా దూరంగా ఉండే పాత్రల్లో, కథల్లో నటిస్తూ ఉంటారు. కానీ విజయ్‌ సేతుపతి మాత్రం చాలా నేచురల్‌ గా ఉండే పాత్రలు మరియు కథలతో సినిమాలు చేస్తూ ఉంటాడు. ఇప్పుడు కూడా పాండిరాజ్ దర్శకత్వంలో చేస్తున్న సినిమాలో ఒక పరోటా మాస్టర్‌ రోల్‌ లో కనిపించబోతున్నాడు. సాధారణంగా ఏ స్టార్‌ నటుడు కూడా అలాంటి పాత్రలో నటించేందుకు ఆసక్తి చూపించరు. కానీ విజయ్ సేతుపతి నటన ప్రతిభ ను కనబర్చేందుకు ఎలాంటి పాత్రను అయినా చేసేందుకు ముందు ఉంటాడు.

గతంలోనే ఆయన చేసిన పలు పాత్రలు ఆ విషయాన్ని నిర్థారించాయి. ఇప్పుడు కూడా విజయ్‌ సేతుపతి నటుడిగా చాలా స్పెషల్‌ అంటూ నిరూపించే విధంగా పరోటా మాస్టర్‌ రోల్‌ లో కనిపించబోతున్నాడు. ఇటీవల ఒక ఇంటర్వ్యూలో నిత్యా మీనన్ మాట్లాడుతూ పాండిరాజ్ దర్శకత్వంలో రూపొందుతున్న సినిమా విశేషాలను వెల్లడించింది. అందులో భాగంగానే విజయ్ సేతుపతి పాత్ర చాలా విభిన్నంగా ఉంటుందని ఆయన్ను పరోటా మాస్టర్ అనే సింపుల్‌ వ్యక్తి పాత్రలో చూడబోతున్నారని చెప్పుకొచ్చింది. ఇక తాను జీరాక్స్‌ షాప్ నిర్వహించే ఒక సాదారణ మహిళ పాత్రలో కనిపించబోతున్నట్లుగా చెప్పుకొచ్చింది.