వీడియో: విమానంలో ఒక్కసారిగా కుదుపులు... 30 మందికి గాయాలు!

ఇటీవల కాలంలో విమాన ప్రయాణికులు ఎదుర్కొంటున్న ఇబ్బందులు వైరల్ గా మారుతున్న సంగతి తెలిసిందే. విమానం గాల్లో ఉన్న సమయంలో ఎమర్జెన్సీ డోర్లు ఊడిపోవడం మొదలు పలు ఇబ్బంది కర పరిస్థితులు నెలకొంటున్న సంగతి తెలిసిందే! ఈ నేపథ్యంలో తాజాగా విమానం గాల్లో ఉండగా భారీ కుదుపులు సంభవించాయి.. దీంతో 30 మందికిపైగా గాయపడ్డారాని అంటున్నారు.

అవును... విమానంలో ఒక్కసారిగా కుదుపులు వచ్చాయి. దీంతో.. ఆ విమానంలోని ప్రయాణికులంతా ఒక్కసారిగా భయబ్రాంతులకు గురయ్యారు. ఆ కుదుపుల తీవ్రత ఏ స్థాయిలో ఉందంటే... కొంతమంది సీట్లలో నుంచి ఎగిరిపడగా.. ఒక వ్యక్తి అయితే ఏకంగా ఓవర్ హెడ్ బిన్ లో ఇరుక్కుపోయాడు. ఈ సమయంలో తోటి ప్రయాణికులు అతడిని కిందకి దించుతున్న దృశ్యాలు వైరల్ గా మారాయి.

ఎయిర్ యూరోపా విమానయాన సంస్థకు చెందిన బోయింగ్ 789-9 విమానం 325 మంది ప్రయాణికులతో స్పెయిన్ నుంచి ఉరుగ్వేకు బయలుదేరింది. ఆ సమయంలో ఒక్కసారిగా కుదుపులకు లోనైంది. ఈ సమయంలో ఆ విమానంలోని ప్రయాణికులు ఎగిరెగిరి పడ్డారు. పిల్లలైతే ఏడుపులు, కేకలతో హోరెత్తించేశారట. దీంతో... బ్రెజిల్ లోని నాటల్ విమానశ్రయంలో ఎమెర్జెన్సీ ల్యాండింగ్ చేశారు.

ఈ నేపథ్యంలో ఈ ఘటనపై ఎయిర్ యూరోపా సంస్థ స్పందించింది. ఇందులో భాగంగా... విమానం సురక్షితంగా ల్యాండ్ అయ్యిందని.. గాయపడినవారికి చికిత్స అందిస్తున్నామని తెలిపింది. ఇదే సమయంలో ప్రయాణికులను తరలించేందుకు ప్రత్యేక ఏర్పాట్లు చేస్తున్నట్లు వెల్లడించింది.