వైజాగ్ లో మరో క్రికెట్ స్టేడియం... బీసీసీఐ హామీ!

ఈ ఏడాది క్రికెట్ "ప్రపంచ కప్ - 2023"కు ఆతిధ్యం ఇస్తున్న నేపథ్యలో బీసీసీఐ దూకుడు మీదుంది. ఇప్పటికే గోల్డెన్ టికెట్ అంటూ సరికొత్త ఆహ్వానాలను క్రియేట్ చేసిన బీసీసీఐ... మరోపక్క దేశవ్యాప్తంగా క్రికెట్ కున్న ఆధారణ నేపథ్యంలో కొత్త కొత్త అంతర్జాతీయ స్టేడియంల నిర్మాణాలకు ప్లాన్ చేస్తుంది. ఈ సమయంలో వైజాగ్ లో అంతర్జాతీయ క్రికెట్ స్టేడియంను తీసుకురాబోతుంది!

అవును... వైజాగ్ లో మరో అంతర్జాతీయ క్రికెట్ స్టేడియం నిర్మాణానికి బీసీసీఐ హామీ ఇచ్చింది. ఇప్పటికే కొన్ని అంతర్జాతీయ క్రికెట్ మ్యాచ్‌ లు జరిగే విశాఖపట్నంలోని డాక్టర్ వైఎస్ రాజశేఖర్ రెడ్డి క్రికెట్ స్టేడియంను ఆంధ్రా క్రికెట్ అసోసియేషన్ నిర్వహిస్తోన్న సంగతి తెలిసిందే. అయితే ఇప్పటి వరకు తెలుగు రాష్ట్రాలకు, ముఖ్యంగా ఆంధ్రప్రదేశ్‌ కు బీసీసీఐ ఇస్తున్న ప్రాధాన్యత స్వల్పం. ఈ నేపథ్యంలో బీసీసీఐ కార్యదర్శి జై షా కీలక ప్రకటన చేశారు.

వైజాగ్‌ లో కొత్త అంతర్జాతీయ స్టేడియం నిర్మాణానికి అన్ని రకాల సహాయ సహకారాలు అందిస్తామని బీసీసీఐ కార్యదర్శి జై షా హామీ ఇచ్చారు. గోవాలో జరిగిన బీసీసీఐ 92వ వార్షికోత్సవ సమావేశంలో జై షా.. ఈ మేరకు ఆంధ్ర క్రికెట్ అసోసియేషన్ (ఏసీఏ) పెద్దలకు ఈ హామీ ఇచ్చారు. బీసీసీఐ వార్షికోత్సవ సమావేశానికి ఆంధ్ర క్రికెట్ అసోసియేషన్ అధ్యక్షులు శరత్ చంద్రారెడ్డి, సెక్రటరీ గోపినాథ్ రెడ్డి, ట్రెజరర్ ఎ.వి. చలం హాజరయ్యారు.

ఈ సందర్భంగా... ఆంధ్ర క్రికెట్‌ కు సంబంధించి పలు అభివృద్ధి కార్యక్రమాల గురించి బీసీసీఐ అధ్యక్షులు రోజర్ బిన్నీ, సెక్రటరీ జై షా, ఉపాధ్యక్షులు రాజీవ్ శుక్లా తదితరులతో ఆంధ్ర క్రికెట్ అసోసియేషన్ పెద్దలు చర్చించారు. ఈ నేపథ్యంలోనే త్వరలో విశాఖపట్నంలో మరో అంతర్జాతీయ క్రికెట్ స్టేడియం నిర్మించడానికి హామీ ఇచ్చినట్లు ఏసీఏ పెద్దలు వెల్లడించారు.

కాగా... ఉత్తర‌ప్రదేశ్‌ లోని వార‌ణాసిలో 30 ఎక‌రాల్లో, సుమారు 450 కోట్లు పెట్టి వార‌ణాసిలో అంత‌ర్జాతీయ క్రికెట్ స్టేడియాన్ని నిర్మిస్తున్న సంగతి తెలిసిందే. శివుడి శిర‌స్సుపై ఉన్న నెల‌వంక రూపంలో స్టేడియం రూఫ్‌ ల‌ను.. ఇక ఫ్లడ్ లైట్లను త్రిశూలం ఆకారంలో రూపొందిస్తున్న సంగతి తెలిసిందే. ఇదే క్రమంలో త్వరలో విశాఖలో కూడా మరో నూతన అంతర్జాతీయ క్రికెట్ స్టేడియం నిర్మాణానికి బీసీసీఐ నుంచి హామీ వచ్చింది!