నేటి సంపాదన.. రేపటి హీరోయిన్.. ఎకో ఫ్రెండ్లీ పార్క్ లో "చిరు"నవ్వులు!

రంగారెడ్డి జిల్లా పొద్దుటూరులో ఏర్పాటు చేసిన అతిపెద్ద ఎకో ఫ్రెండ్లీ పార్క్ ప్రకృతి ప్రేమికులకు అందుబాటులో రానుంది. ఈ పార్క్ ప్రారంభోత్సవం నేడు జరిగింది. ఈ సందర్భంగా జరిగిన కార్యక్రమంలో ముఖ్య అతిథిగా పాల్గొన్న మెగాస్టార్ చిరంజీవి పాల్గొని ప్రసంగించారు. ఈ సందర్భంగా మొక్కలపై తనకున్న ఆసక్తి గురించి చెబుతూ.. తన నేటి సంపాదన, రేపటి హీరోయిన్ గురించి ఆసక్తికర వ్యాఖ్యలు చేశారు.

అవును... ఎకో ఫ్రెండ్లీ ఎక్సీపీరియం పార్క్ ప్రారంభోత్సవం సందర్భంగా జరిగిన కార్యక్రమంలో సీఎం రేవంత్ తో కలిసి చిరంజీవి పాల్గొన్నారు. ఈ సందర్భంగా మాట్లాడిన చిరంజీవి.. ఇప్పుడు పార్క్ ఉన్న ఈ ప్రదేశం అందరికంటే ముందు తనకు తెలుసని.. తాను హైదరాబాద్ లో ఇల్లు కడుతున్నానని తెలిసి, ఈ పార్క్ ను తీర్చి దిద్దిన రాందేవ్ కొన్ని మొక్కలు తెచ్చి ఇచ్చారని అన్నారు.

ఆ సమయం నుంచే రాందేవ్ తో తనకు పరిచయం ఉందని.. మా ఇంటిదగ్గర నేను రోజూ కూర్చొనే ప్రదేశంలో బయటకు కనిపించకుండా ఫెన్సింగ్ లా డిజైన్ చేయమంటే.. ఆయన అద్భుతంగా డిజైన్ చేశారని.. ఆ డిజైన్ తనకు చాలా ఇష్టమని అన్నారు. ఈక్రమలోనే.. అప్పుడప్పుడూ కొత్తగా మొక్కలు వచ్చాయి చుస్తారా అని అడుగుతుంటారని చిరంజీవి వెల్లడించారు.

ఈ సందర్భంగా... ఒకప్పుడు వాటి ధరలు వేలు, లక్షల్లో ఉండేవి కానీ.. ఇపుడు కోట్లలో ఉంటున్నాయి అని చెప్పిన చిరు.. "అసలే ఇప్పుడు నా సంపాదన అంతంత మాత్రంగా ఉంది.. కొనలేనేమో అనిపించింది.. గౌరవ ముఖ్యమంత్రితో ఇక్కడకు వచ్చి చూస్తే అన్నీ కొనేయాలనిపిస్తోంది" అంటూ వ్యాఖ్యానించారు. దీంతో.. సభలో ఒక్కసారిగా నవ్వులు విరిసాయి.

ఇదే సమయంలో... దీన్ని షూటింగ్ కి ఇస్తారా అని రాందేవ్ ని అడిగితే.. ఫస్ట్ మీ మూవీ షూటింగ్ అయితే ఇస్తా అన్నారు అని చిరు చెప్పారు. ఈ సమయంలోనే... ‘కొత్త హీరోయిన్ ను తీసుకొచ్చి స్టెప్పులు వేయాలంటే ఈ ఎండలో ఎలా ఉంటుందో.. శీతాకాలం చూద్దాం.. ఈలోగా వర్షాలు పడి, మరింత పచ్చదనం పెరుగుతుంది.. ఒకట్రెండేళ్లలో కంటికి ఇంపుగా ఉంటుంది’ అని చిరు అనగానే.. సభలో మరోసారి నవ్వులు విరిసాయి.

ఇక ప్రభుత్వం కూడా రాందేవ్ ఆలోచనలకు సహకారం అందించి, టూరిజం అభివృద్ధికి కృషి చేస్తుందని ఆశిస్తున్నట్లు చిరంజీవి తెలిపారు. ఈ పార్క్ హైదరాబాద్ కే అద్భుతమైన ల్యాండ్ మార్క్ అవుతుందని.. రాష్ట్రానికి వన్నే తీసుకొస్తుందని.. హైదరాబాద్ ఒక ఇల్లు అనుకుంటే.. ఆ ఇంట్లో ఇదొక చక్కని పెయింటింగ్ పెట్టుకున్నట్లుగా ఉంటుందని చిరంజీవి అభివర్ణించారు!