సీఎం రేవంత్ రెడ్డికి ఫస్ట్ బిగ్ హీరో విషెస్
కాసేపటి క్రితమే ఈ ప్రమాణ స్వీకారం జరిగింది. గవర్నర్ తమిళిసై సౌందర రాజన్ రేవంత్ రెడ్డి తో రాజ్యాంగబద్ధంగా ప్రమాణం చేయించారు.
ఇటీవల జరిగిన తెలంగాణ రాష్ట్ర అసెంబ్లీ ఎన్నికల్లో కాంగ్రెస్ ఘన విజయం సాధించిన విషయం తెలిసిందే. తెలంగాణ ఏర్పడిన తర్వాత మొదటిసారి కాంగ్రెస్ అధికారంలోకి రావడంతో ఈసారి సీఎం ఎవరు అవుతారనే దానిపైనే అందరి దృష్టి ఏర్పడింది. దాదాపు అందరూ ఊహించినట్టుగానే కాంగ్రెస్ డైనమిక్ లీడర్ ఎనుముల రేవంత్ రెడ్డి తెలంగాణ నూతన ముఖ్యమంత్రిగా బాధ్యతలు చేపట్టారు. ఈరోజు హైదరాబాద్ ఎల్బీ స్టేడియంలో ముఖ్యమంత్రిగా రేవంత్ రెడ్డి పదవి ప్రమాణ స్వీకారం చేశారు.
కాసేపటి క్రితమే ఈ ప్రమాణ స్వీకారం జరిగింది. గవర్నర్ తమిళిసై సౌందర రాజన్ రేవంత్ రెడ్డి తో రాజ్యాంగబద్ధంగా ప్రమాణం చేయించారు. ఈ నేపథ్యంలో పలువురు రాజకీయ ప్రముఖులు ఆయనకి శుభాకాంక్షలు తెలిపారు. ఇక తాజాగా టాలీవుడ్ తరఫునుంచి మెగాస్టార్ చిరంజీవి నూతన సీఎం రేవంత్ రెడ్డికి శుభాకాంక్షలు తెలిపారు.
ట్విట్టర్ వేదికగా చిరు ట్వీట్ చేస్తూ.." తెలంగాణ కొత్త ముఖ్యమంత్రిగా పదవీ ప్రమాణ స్వీకారం చేపట్టిన రేవంత్ రెడ్డికి హార్దిక శుభాభినందనలు. మీ నాయకత్వంలో మన తెలంగాణ రాష్ట్రం గొప్పగా అభివృద్ధి పథంలోకి దూసుకెళ్లాలని, ఉన్నత స్థాయికి ఎదగాలని ఆకాంక్షిస్తున్నాను" అంటూ పేర్కొన్నారు. అంతేకాకుండా డిప్యూటీ సీఎం గా నియమితులైన మల్లు భట్టివిక్రమార్కకు, నూతన మంత్రి వర్గానికి, కాంగ్రెస్ శాసనసభపక్షానికి చిరంజీవి తన శుభాకాంక్షలు అందజేశారు.
తెలంగాణ నూతన ముఖ్యమంత్రిగా ప్రమాణ స్వీకారం చేపట్టిన తర్వాత రేవంత్ రెడ్డికి ఫస్ట్ విషెస్ అందించిన సెలబ్రిటీ మెగాస్టార్ చిరంజీవి కావడం విశేషం. గతంలో చిరంజీవి రాజకీయాల్లోకి వచ్చి ప్రజారాజ్యం పార్టీ పెట్టినప్పుడు కొన్ని పరిణామాల నేపథ్యంలో తన పార్టీని కాంగ్రెస్ లో విలీనం చేసిన విషయం తెలిసిందే. కాంగ్రెస్ హయాంలో చిరంజీవి కేంద్ర మంత్రి పదవిలోనూ కొనసాగారు. ఆ తర్వాత రాజకీయాలకు పూర్తిగా దూరమై మళ్ళీ సినిమాల్లోకి వచ్చేసారు.
అయితే అధికారికంగా చిరంజీవి పార్టీకి రాజీనామా చేయకపోవడం వల్ల సాంకేతికంగా ఇంకా కాంగ్రెస్ లోనే ఉన్నట్లు అందరూ భావిస్తుంటారు. ఇప్పుడు కాంగ్రెస్ అధికారంలోకి రావడంతో అందరికంటే ముందుగా చిరంజీవి ఇలా రేవంత్ రెడ్డికి శుభాకాంక్షలు తెలియజేయడం సర్వత్ర ఆసక్తికరంగా మారింది. ఇక మెగాస్టార్ సినిమాల విషయానికొస్తే, యువ దర్శకుడు వశిష్ట దర్శకత్వంలో ఓ సోషియో ఫాంటసీ మూవీ చేస్తున్నాడు. UV క్రియేషన్స్ నిర్మిస్తున్న ఈ మూవీకి 'విశ్వంబర' అనే టైటిల్ ని పరిశీలిస్తున్నట్లు తెలుస్తోంది.