బాలీవుడ్ సినిమాకు సంతకం చేసిన మోనాలిసా... బడ్జెట్ ఎంతో తెలుసా?

ఉత్తరప్రదేశ్ లోని ప్రయాగ్ రాజ్ లో జరుగుతున్న మహా కుంభమేళాకు ప్రపంచ వ్యాప్తంగా కోట్లాది మంది భక్తులు తరలివస్తున్న సంగతి తెలిసిందే. ఇన్ని కోట్ల మంది భక్తుల్లోనూ పూసల దండలు అమ్మే మోనాలిసా అనే అమ్మాయి సోషల్ మీడియా వేదికగా వైరల్ గా మారిన సంగతి తెలిసిందే. ఆమె రాత్రికి రాత్రి సోషల్ మీడియా సెలబ్రెటీ అయిపోయింది.

ఆమెకు సంబంధించిన ఫోటోలు, వీడియోలు నెట్టింట వైరల్ గా మారాయి. ఆమెకు నెట్టింట ఫ్యాన్స్ పుట్టుకొచ్చారు. ఆమె స్కిన్ టోన్, కళ్లు, అవి చూసే అమాయకపు చూపులకు నెటిజన్లు ఫిదా అయిపోయారు. ఈ సమయలో ఆమెకు సినిమాల్లో అవకాశాలు ఇవ్వాలనే కోరికలూ వెల్లడించారు. అనుకున్నట్లుగానే తాజాగా ఓ సినిమాకు మోనాలిసా సంతకం చేసింది.

అవును... మహా కుంభమేళాలో పూసల దండలు అమ్మె మోనాలిసా ఫ్యాన్స్ కు ఓ గుడ్ న్యూస్ తెరపైకి వచ్చింది. ఇందులో భాగంగా... ఆమె తన తొలి బాలీవుడ్ సినిమాకు సంతకం చేసింది. ఆమెకు తన సినిమాలో ఛాన్స్ ఇస్తున్నట్లు బాలీవుడ్ డైరెక్టర్ సనోజ్ మిశ్రా ప్రకటించారు. ఆమెతో కలిసి మాట్లాడిన ఓ వీడియో విడుదల చేశారు.

తాజాగా మధ్యప్రదేశ్ లోని ఇండోర్ లో ఖర్గోన్ జిల్లా మహేశ్వర్ లోని మోనాలిసా ఇంటికి వెళ్లారు సనోజ్ మిశ్రా. అక్కడ మోనాలిసా తండ్రి జై సింగ్ భోంస్లే ని కలిసి.. సినిమా పరిశ్రమ గురించి వివరిస్తూ, పలు సందేహాలను నివృత్తి చేశారు. అనంతరం.. తన సినిమాలో ఆమె నటించేందుకు అనుమతి తీసుకున్నారు. ఈ విషయాన్ని సనోజ్ మిశ్రా వెల్లడించారు.

కాగా... సనోజ్ మిశ్రా తెరకెక్కించనున్న చిత్రం పేరు "ది డైరీ ఆఫ్ మణిపూర్". ఈ సినిమాలోనే మోనాలిసా నటించనుంది. ఇందులో ఆమె ఓ రిటైర్డ్ ఆర్మీ అధికారి కుమర్తెగా కనిపించనుందని అంటున్నారు. ఈ సినిమా ద్వారా బాలీవుడ్ స్టార్ హీరో రాజ్ కుమార్ రావు సోదరుడు అమిత్ రావు ఎంట్రీ ఇవ్వనున్నారు. ఈ సినిమా బడ్జెట్ సుమారు రూ.20 కోట్లని అంటున్నారు.

ఈ నేపథ్యంలో త్వరలోనే ఈ సినిమా షూటింగ్ ప్రారంభం కానుందని.. ఏప్రిల్ నుంచి మోనాలిసా షూటింగ్ కు హాజరు కానుందని.. అక్టోబర్ లో ఈ చిత్రాన్ని ప్రేక్షకుల ముందుకు తీసుకువచ్చే అవకాశం ఉందని అంటున్నారు. ఈ గ్యాప్ లో మోనాలిసాకు యాక్టింగ్ లో శిక్షణ ఇవ్వనున్నారు.