9 నెలల అంతరిక్ష యాత్రకు ‘సునీత విలయమ్స్’ ఎంత సంపాదించిందంటే?

అంతరిక్ష యాత్ర.. భూమిని దాటి.. ప్రాణాలకు తెగించి చేసే సాహసయాత్ర.. ఆక్సిజన్ ఉండదు.. ఊపిరి ఆడదు.. గాల్లో తేలియాడుతుండాలి.. తినడానికి, పడుకోవడానికి కష్టమే.. కాళకృత్యాలు కూడా సరిగ్గా తీసుకోలేం. అంతటి క్లిష్ట పరిస్థితుల్లో జీవించాలంటే గట్స్ ఉండాలి. అలాంటిది మన మహిళా మణి సునీత విలయమ్స్ వారం పాటు వెళ్లి తొమ్మిది నెలలుగా అంతరిక్షంలో చిక్కుకుపోయింది.. మరి అన్ని రోజులు అంతరిక్షంలో ఉన్న సునీతకు అసలు ఎంత వస్తుంది? ఆమె సంపాదన ఎంత? అన్న దానిపై స్పెషల్ ఫోకస్..

నాసా వ్యోమగాములు సునీతా విలియమ్స్ , బచ్ విల్‌మోర్ 2023లో ఎనిమిది రోజుల పాటు అంతర్జాతీయ అంతరిక్ష కేంద్రానికి వెళ్లారు. అయితే బోయింగ్ స్టార్‌లైనర్ నౌకలో తలెత్తిన సాంకేతిక సమస్యల కారణంగా వారి మిషన్ ఊహించని విధంగా తొమ్మిది నెలల పాటు కొనసాగింది. ఎట్టకేలకు వారు మార్చి 19 తర్వాత భూమికి తిరిగి వచ్చే అవకాశం ఉంది. ఈ నేపథ్యంలో, వారి సుదీర్ఘమైన అంకితభావంతో కూడిన సేవలకు వారికి ఎంత వేతనం లభిస్తుందనే విషయం అందరి దృష్టిని ఆకర్షిస్తోంది.

నాసా వ్యోమగాములు సాధారణంగా ఫెడరల్ ప్రభుత్వ ఉద్యోగులుగా పరిగణించబడతారు. వారి అంతరిక్ష ప్రయాణాన్ని భూమిపై పనిచేసినట్లే భావిస్తారు, కాబట్టి వారికి అదనపు సమయానికి వేతనం ఉండదు. ప్రస్తుతం అందుబాటులో ఉన్న సమాచారం ప్రకారం, సునీతా విలియమ్స్ , బచ్ విల్‌మోర్ ఇద్దరూ GS-15 పే గ్రేడ్‌లో ఉన్నారు. ఈ స్థాయి ఉద్యోగుల వార్షిక వేతనం సుమారు $125,133 నుంచి $162,672 వరకు ఉంటుంది. దీనిని బట్టి, తొమ్మిది నెలల కాలానికి వారి సంపాదన సుమారు $93,850 నుంచి $122,004 మధ్య ఉండే అవకాశం ఉంది. భారతీయ కరెన్సీలో ఇది దాదాపు రూ. 81 లక్షల నుంచి 1.05 కోట్ల వరకు ఉంటుంది.

దీనికి అదనంగా, వారు ప్రతిరోజు నాసా నుండి స్వల్ప మొత్తంలో ఖర్చుల కోసం అలవెన్స్ పొందుతారు. ఇది రోజుకు కేవలం $4 మాత్రమే. అంటే, మొత్తం 287 రోజుల పాటు సునీతా విలియమ్స్‌కు అదనంగా లభించే మొత్తం కేవలం $1,148 (సుమారు రూ. 1 లక్ష) మాత్రమే. మొత్తంగా చూసుకుంటే, ఈ తొమ్మిది నెలల మిషన్ ద్వారా ఆమె దాదాపు $94,998 నుంచి $123,152 (సుమారు రూ. 82 లక్షల నుంచి 1.06 కోట్లు) వరకు సంపాదించే అవకాశం ఉంది.

అంతరిక్షంలో తొమ్మిది నెలలు గడపడం శారీరకంగా.. మానసికంగా ఎంతో ఒత్తిడితో కూడుకున్నప్పటికీ, వారి వేతనంలో పెద్దగా మార్పు లేకపోవడం గమనార్హం. అయితే, వారి ఆరోగ్యం , వైద్య ఖర్చుల బాధ్యతను నాసా పూర్తిగా చూసుకుంటుంది.

ప్రస్తుతం స్పేస్ఎక్స్ డ్రాగన్ నౌక ద్వారా వారిని తిరిగి భూమికి తీసుకురావడానికి సహాయక మిషన్ విజయవంతంగా ప్రారంభించబడింది. దీంతో వారు త్వరలోనే తమ ఇళ్లకు చేరుకుంటారని ఆశిస్తున్నారు. భూమిపై అడుగు పెట్టిన తర్వాత వారు సాధారణ స్థితికి రావడానికి కొంత సమయం పట్టవచ్చు.