లోకేశ్, పవన్ భాయి... భాయీ.. డిప్యూటీ సీఎం లొల్లి ఉత్తిదేనా?

కూటమి ప్రభుత్వంలో చిచ్చు రేగుతోందంటూ వస్తున్న వార్తలన్నీ వదంతులేనని మరోసారి తేలిపోయింది. ఇటీవల కాలంలో కూటమిలో ముఖ్యనేతలు డిప్యూటీ సీఎం పవన్ కల్యాణ్, టీడీపీ యువనేత లోకేశ్ అభిమానుల మధ్య సోషల్ మీడియాలో జరుగుతున్న వాగ్యుద్ధానికి ఎండ్ కార్డ్ పడింది. ఇక ఈ ఇద్దరు నేతలు రిపబ్లిక్ డే పరేడ్ లో కలుసుకోవడం, మనసువిప్పి మాట్లాడుకోవడంతో ఇరుపార్టీల కార్యకర్తలు ఊపిరిపీల్చుకున్నారు.

రిపబ్లిక్ డే పరేడ్ సందర్భంగా యువనేత లోకేశ్, డిప్యూటీ సీఎం పవన్ కల్యాణ్ కలుసుకున్నారు. ఇద్దరూ హాయిగా నవ్వుతూ మాట్లాడుకోవడంతో ఇటీవల జరగుతున్న ప్రచారం ఆ ఇద్దరి సంబంధాల్లో ఎలాంటి ప్రభావం చూపలేదని స్పష్టమైంది. కూటమిలో ప్రస్తుతం జనసేనాని పవన్ ఒక్కరే డిప్యూటీ సీఎంగా ఉన్న విషయం తెలిసిందే. అయితే టీడీపీ యువనేత, రాష్ట్ర ఐటీ, హెచ్ఆర్డీ మంత్రి లోకేశ్ కు డిప్యటీ సీఎం హోదా ఇవ్వాలని ఆ పార్టీ నేతలు డిమాండ్ చేశారు. ముఖ్యమంత్రి చంద్రబాబు సమక్షంలోనే మొదలైన ఈ డిమాండ్.. దావోస్ వేదికగా కాబోయే సీఎం అనే వరకు వెళ్లింది.

ఈ తరహా మాటలు కూటమిలో గ్యాప్ పెంచుతాయనే ఉద్దేశంతో ఇరుపార్టీల అధిష్ఠానాలు.. ఈ విషయంలో ఎవరూ మాట్లాడొద్దంటూ హుకుం జారీచేయడంతో ఆగిపోయాయి. ఇక సోషల్ మీడియాలో మాత్రం ఇద్దరు నేతల అభిమానులు మాత్రం వాదోపవాదాలు కొనసాగిస్తూనే ఉన్నారు. దీనివల్ల భవిష్యత్లో ఇబ్బందులు తప్పవని కూటమిలో భయాందోళన వ్యక్తమవుతోంది. ఇలాంటి పరిస్థితుల్లో ఇద్దరు నేతలు ఓ చోట కలుసుకోవడం, హాయిగా మాట్లాడుకోవడం.. మేమిద్దరం ఒక్కటిగానే ఉన్నామనే సంకేతాలివ్వడంతో వివాదం కాస్త టీ కప్పులో తుఫాన్ లా సమసిపోయిందంటున్నారు.