రష్యాతో ఎవడు పెట్టుకోమన్నాడు? ఉక్రెయిన్ నే తలంటిన ట్రంప్

సరిగ్గా మూడేళ్ల కిందట.. 2022 ఫిబ్రవరి 24న ప్రపంచమంతటా ఒకటే హడావుడి.. కారణంగా ఉక్రెయిన్ పై రష్యా దాడిచేయడం. అమెరికా అప్పటి అధ్యక్షుడు బైడెన్ సహా వెస్ట్రన్ కంట్రీస్ అధినేతలు ఎంతగా ఉరిమినా.. ఇప్పటికీ రష్యాను ఏమీ చేయలేకపోయారు. కానీ, ఇప్పుడు కాలం మారింది. అమెరికాకు ట్రంప్ అధ్యక్షుడు అయ్యారు. తాను గనుక ప్రెసిడెంట్ గా ఉండి ఉంటే అసలు రష్యా-అమెరికా యుద్ధమే జరగకపోయేదని ట్రంప్ మొదటి నుంచి చెబుతున్నారు. రష్యా అధినేత పుతిన్ తో తనకు ఉన్న సంబంధాల రీత్యా ట్రంప్ ఈ వ్యాఖ్యలు చేసి ఉండొచ్చు. కానీ, వాస్తవంలో చూస్తే ఆయన చెప్పేది సరైనదే.

ఉక్రెయిన్ కు నాటో సభ్యత్వం అనేది సాధ్యం కాదని మొన్న కుండబద్దలు కొట్టిన ట్రంప్.. నేడు అసలు రష్యాతో యుద్ధానికి ఎవరు వెళ్లమన్నారంటూ ఉక్రెయిన్ ను తప్పుబట్టారు. యుద్ధానికి ఉక్రెయినే కారణమని కూడా నిందించారు. యుద్ధానికి ముందే రష్యాతో ఒప్పందం చేసుకుని ఉండాల్సిందనే అభిప్రాయం వ్యక్తం చేశారు. ఫ్లోరిడాలోని తన భవనంలో ట్రంప్ మీడియాతో మాట్లాడుతూ

ఉక్రెయిన్‌ యుద్ధంపై కీలక వ్యాఖ్యలు చేశారు.

సౌదీ అరేబియాలో మంగళవారం నుంచి మొదలైన శాంతి చర్చల్లో ఉక్రెయిన్ ను భాగస్వామ్యం చేయలేదు. రష్యా –అమెరికా మంత్రుల స్థాయిలో జరుగుతున్న ఈ చర్చలకు ఉక్రెయిన్ ను పిలకపోవడంపై వస్తున్న విమర్శలను ట్రంప్ కొట్టిపారేశారు.

‘యుద్ధాన్ని ముగించే శక్తి నాకుందని భావిస్తున్నా. ఇప్పటివరకు అంతా సజావుగానే జరుగుతోంది’’ అని చెప్పారు. మూడేళ్లుగా యుద్ధాన్ని ముగించకుండా ఏం చేస్తున్నావ్ ? అని జెలెస్కీని ఉద్దేశించి విమర్శించారు. అసలు మొదలుపెట్టి ఉండాల్సింది కాదన్నారు. ఏదో ఒక ఒప్పందం చేసుకుని ఉండాల్సిందని పేర్కొన్నారు. ఉక్రెయిన్‌ కోసం ఒప్పందం కుదర్చుతానని.. అది పోగొట్టుకొన్న దాదాపు మొత్తం భూమిని తిరిగి ఇప్పించగలనని ట్రంప్ అన్నారు. ప్రజలు ఎవరూ చనిపోరని.. ఏ నగరమూ నేలమట్టం కావాల్సిన అవసరం రాదని వివరించారు. కానీ, వారు అలా జరగకూడదనుకొన్నారని ట్రంప్ జెలెన్‌ స్కీని ఉద్దేశించి అన్నారు. జెలెన్ స్కీ నేతృత్వంలో ఉక్రెయిన్‌ అతిపెద్ద విధ్వంస ప్రదేశంగా మారిపోయిందని మండిపడ్డారు. ఉక్రెయిన్ లో ఎన్నికలు నిర్వహించాలని.. జెలెన్‌ స్కీకి 4 శాతం మాత్రమే ప్రజా మద్దతు ఉందని ఘాటుగా వ్యాఖ్యానించారు.

నెలాఖరులో తాను పుతిన్‌తో భేటీ అయ్యే అవకాశం ఉందని, వినాశనం ఆపడానికి ఏదో చేద్దామనుకుంటోందని.. ప్రతి వారం వేల మంది సైనికులు చనిపోతున్నారని ట్రంప్‌ వెల్లడించారు. ము దీనిని ముగించాలనుకొంటున్నట్లు పేర్కొన్నారు. ఇది బుద్ధి తక్కువ యుద్ధమని ట్రంప్‌ అభివర్ణించారు.