క‌ర్ణాట‌క ఎన్నిక‌ల బ‌రిలో సాయి కుమార్?

త్వ‌ర‌లో జ‌ర‌గ‌బోతోన్న క‌ర్ణాట‌క అసెంబ్లీ ఎన్నికల కోసం అధికార కాంగ్రెస్ - బీజేపీల మ‌ధ్య హోరాహోరీగా పోరు జ‌ర‌గ‌బోతోంది. రాబోయే సాధార‌ణ ఎన్నిక‌ల ముందు ఇరు పార్టీలు ఈ ఎన్నిక‌ల‌ను ప్ర‌తిష్టాత్మ‌కంగా తీసుకున్నాయి. దీంతో, క‌న్న‌డ ఓట‌ర్ల‌ను ఆక‌ట్టుకునేందుకు తీవ్రంగా కృషి చేస్తున్నాయి. ఈ నేప‌థ్యంలో క‌ర్ణాట‌క అసెంబ్లీ ఎన్నిక‌ల బ‌రిలో న‌టుడు సాయికుమార్ దిగ‌బోతున్న‌ట్లు తెలుస్తోంది. బాగేప‌ల్లి నియోజ‌క‌వ‌ర్గం నుంచి బీజేపీ త‌ర‌ఫున సాయి కుమార్ ను రంగంలోకి దిగేందుకు స‌న్నాహాలు చేస్తున్న‌ట్లు తెలుస్తోంది. గ‌తంలో ఓ సారి క‌ర్ణాట‌క ఎన్నిక‌ల్లో  బీజేపీ త‌ర‌ఫున బ‌రిలోకి దిగిన సాయి కుమార్ ఓట‌మిపాల‌య్యారు. దీంతో, ఈ సారి త‌న అదృష్టాన్ని ప‌రీక్షించుకునేందుకు రెడీ అవుతున్నార‌ని తెలుస్తోంది.   

గ‌తంలో కూడా సాయి కుమార్ బాగేపల్లి అసెంబ్లీ సెగ్మెంట్ నుంచి పోటీ చేశారు. కన్నడ ప్ర‌జ‌ల ద‌గ్గ‌ర సాయి కుమార్ కు స్టార్ ఇమేజ్ ను బీజేపీ క్యాష్ చేసుకోవాల‌ని భావించింది. అయితే, సాయికుమార్ ను విజ‌యం వ‌రించ‌లేదు. దీంతో, తాజాగా - మ‌రోసారి క‌ర్ణాట‌క ఎన్నిక‌ల బ‌రిలో దిగేందుకు ఆయ‌న ప్రయత్నిస్తున్న‌ట్లు స‌మాచారం. స్థానిక నేతలతో పాటు సాయికుమార్ కూడా టికెట్ కోసం పోటీలో ఉన్న‌ట్లు తెలుస్తోంది. ఇండిపెండెంట్ అభ్యర్థి ఎస్ ఎన్ సుబ్బారెడ్డి బాగేపల్లి ఎమ్మెల్యేగా ఉన్నారు. ఆయ‌న‌ కాంగ్రెస్ లో చేర‌బోతున్నారు. బీజేపీ తరఫున సాయికుమార్ తో పాటు మరికొందరు టికెట్ కోసం గ‌ట్టిగా ప్ర‌య‌త్నిస్తున్నారు. ఈ నేప‌థ్యంలో సాయికుమార్ ను బీజేపీ అధిష్టానం ఎంపిక చేస్తుందా? లేదా అన్న‌ది ఆస‌క్తిక‌రంగా మారింది.