వైరల్ : మైదానంలో ప్రేయసికి ప్రపోజ్ చేసిన టీమిండియా క్రికెటర్

ఐపీఎల్ ముగింపు వేళ అనుకోని సంఘటన మైదానంలో చోటుచేసుకుంది. చెన్నై సూపర్ కింగ్స్, పంజాబ్ కింగ్స్ మధ్య జరిగిన చివరి మ్యాచ్ లో ఒక ప్రేమ పుష్పించింది.  మ్యాచ్ ముగిసిన అనంతరం చెన్నై సూపర్ కింగ్స్ ఫ్యామిలీ గ్యాలరీకి వెళ్లిన ఆ జట్టు స్టార్ పేసర్ దీపక్ చాహర్ తన ప్రేయసీకి ప్రపోజ్ చేశాడు. మోకాలిపై కూర్చొని ‘నేను నిన్ను ప్రేమిస్తున్నాను.. నన్ను పెళ్లి చేసుకుంటావా?’ అని అడిగాడు.

దీపక్ చాహర్ హఠాత్తుగా రింగ్స్ పట్టుకొని వచ్చిన చేసిన ఈ పనికి ఆశ్చర్యానికి గురైన అమ్మాయి కొద్దిసేపు స్టన్ అయిపోయింది.. ‘వాట్? ఐ కెనాట్ బిలీవ్’ అంటూ చాహర్ ప్రేమను అంగీకరిస్తూ గట్టిగా హత్తుకుంది. అనంతరం అతడి చేత తన వేలికి ఉంగరాన్ని పెట్టించుకుంది.చాహర్ కు రింగ్ తొడిగింది’. ఇదంతా సినిమా సన్నివేశంలో సాగడంతో అక్కడున్న ప్రేక్షకులు కేరింతలు కొట్టారు.

మ్యాచ్ ముగిసిన అనంతరం చెన్నై ఫ్యామిలీ గ్యాలరీకి వచ్చిన దీపక్ చాహర్ ఏం తెలియనట్టు కొద్దిసేపు నిలబడ్డాడు. ఆ తర్వాత ధోని కూతురు జీవాను పక్కకు జరుపుతూ తన ప్రేయసికి ప్రపోజ్ చేశాడు. దాంతో పక్కనున్న వారంతా అవాక్కయ్యారు. చప్పట్లతో అభినందించారు.

సీఎస్ కే సీఈవో కాశీ విశ్వనాథ్, క్రికెటర్ల ఫ్యామిలీ అంతా ఈ జోడీని ఆశీర్వదించారు. ఇక కామెంటేటర్లు సైతం ఈ జోడిని అభినందించారు. దీపక్ కు శుభాకాంక్షలు తెలిపారు.

ప్రస్తుతం దీపక్ చాహర్ ప్రపోజల్ వీడియో సోషల్ మీడియాలో వైరల్ గా మారింది. చెన్నై ఫ్యాన్స్ సైతం చాహర్ కు అభినందనలు తెలుపుతున్నారు.

తన జీవితంలోనే ఇదో ప్రత్యేకమైన మూమెంట్ అని ఆ వీడియోను దీపక్ చాహర్ ఇన్ స్టా వేదికగా పంచుకున్నాడు. అయితే ఆ అమ్మాయి ఎవరన్నది మాత్రం తెలియరాలేదు.