బిల్‌గేట్స్‌తో అఫైర్ లేదంటూ ఎలాన్ మస్క్ ఆసక్తికర ట్వీట్

టెస్లా సీఈవో ఎలాన్ మస్క్ తాజాగా సోషల్ మీడియాలో చేసిన వ్యాఖ్యలు ఆసక్తికరంగా ఉండటంతో పాటు నెటిజన్ల చర్చకు కారణమయ్యాయి. బిల్‌గేట్స్, నేను ప్రేమికులం అనే వార్త అవాస్తవమని, తనకు ఆయనతో ఎలాంటి అఫైర్ లేదని పేర్కొన్నారు. అతను బిల్‌గేట్స్‌ను ఉద్దేశించి చేసిన ఈ ట్వీట్ నెటిజన్లకు ఆశ్చర్యానికి గురి చేసింది. అయితే అంతకుముందు ఎలాన్ మస్క్ కరోనా మహమ్మారిపై చేసిన వ్యాఖ్యలకు, బిల్‌గేట్స్ స్పందించారు. దీనికి ప్రతిగా మస్క్ ట్వీట్ చేసి ఉంటారని భావిస్తున్నారు.

కరోనా వైరస్ గురించి ప్రపంచ దేశాలు అనవసరంగా భయపడుతున్నాయని, మరణాలను కూడా ఎక్కువ సంఖ్యలో లెక్కిస్తున్నారని ఎలాన్ మస్క్ కొద్ది రోజుల క్రితం అన్నారు. లాక్ డౌన్ అవసరం కూడా లేదని చెప్పారు. ఎలాన్ మస్క్ చేసిన ఈ వ్యాఖ్యలు దుమారం రేపాయి. ఆ తర్వాత బిల్‌గేట్స్ ఓ ఇంటర్వ్యూలో మస్క్ వ్యాఖ్యలపై స్పందించారు.

ఎలాన్ మ‌స్క్ క‌రోనాపై త‌ప్పుడు వ్యాఖ్య‌లు చేయడం మంచిది కాదని, అతను క‌రోనాకు వ్యాక్సిన్ క‌నిపెట్టే విష‌యంలో తలదూర్చలేదని బిల్‌గేట్స్ అన్నారు. ఇంకా మాట్లాడుతూ.. ఎలాన్ మస్క్ ఎలక్ట్రానిక్ కార్లను బాగా తయారు చేయవచ్చునని, రాకెట్స్ కూడా బాగా ప్రయోగించగలడని, ఇలాంటి విషయాల్లో అతను చాలా నైపుణ్యం కలిగినవాడని, కానీ కరోనా వంటి విషయాల గురించి అనవసరంగా మాట్లాడి ఇబ్బందులపాలవుతాడని, అది తనకు నచ్చదని చెప్పారు. ఎలాన్ మస్క్ తనకు తెలిసిన విషయాలకు పరిమితమైతే బాగుంటుందని హితవు పలికారు. ఈ నేపథ్యంలో మస్క్ ట్వీట్ చేశారు.