అమ్మ లేక‌పోతే చిన్న‌మ్మ అలా ఫీల‌వుతోంది

త‌మిళనాడు ముఖ్యమంత్రి దివంగత జయలలితతో మూడుదశాబ్దాలపాటు అత్యంత సన్నిహితంగా మెలిగిన తాను అమ్మ లేకపోవడంతో తాను ఒంటరిననే భావనకు గురవుతున్నానని ఏఐఏడీఎంకే ప్రధాన కార్యదర్శి వీకే శశికళ తెలిపారు. అక్రమాస్తుల కేసులో బెంగళూరులోని పరప్పణ అగ్రహార జైలులో శిక్షను అనుభవిస్తున్న శశికళ ఈ మేరకు పార్టీ కార్యకర్తలకు ఒక లేఖ పంపించారు. పార్టీ కష్టకాలంలో ఉన్నప్పుడు జయలలిత ఎన్నో వ్యయప్రయాసలకు లోనై అన్నాడీఎంకేను బతికించిందని శశికళ చెప్పుకొచ్చారు. ఎంజీఆర్ చనిపోయిన తర్వాత పార్టీని కాపాడిన ఒకేఒక్క ధీర వనిత జయలలిత అని శశికళ ఆ లేఖలో పేర్కొన్నారు. దివంగత ముఖ్యమంత్రి జయలలిత కీర్తి ప్రతిష్ఠలు మరింత పెంపొందేలా ఆమె జయంతి వేడుకలు ఘనంగా నిర్వహించాలని పిలుపునిచ్చారు.

తాను ప్రతి సంవత్సరం జయలలిత వెంటే ఉండి ఎంతో ఆరాధనతో అమ్మ జన్మదిన వేడుకలు నిర్వహించానని, కానీ, ఈ ఏడాది ఆమె లేకుండా వేడుకలు జరుపాల్సి వస్తుందని తాను ఏనాడూ ఊహించలేదని లేఖలో శ‌శిక‌ళ‌ తెలిపారు. 'అమ్మ మన వెంట లేకపోవడం చాలా బాధకు గురిచేస్తోంది. గత 33 ఏళ్లుగా ఆమె వెంట ఉండే జన్మదిన వేడుకలు నిర్వహించాను. ఆమె జ్ఞాపకాలతో ఈ ఏడాది ఒంటరిననే భావన కలుగుతోంది. నా ఆలోచనలు ఆమె చుట్టే తిరుగుతున్నాయి' అని పేర్కొన్నారు. శుక్రవారం జయలలిత 69వ జయంతి సందర్భంగా రాష్ట్రవ్యాప్తంగా పేదలకు సంక్షేమ కార్యక్రమాలు చేపట్టాలని పార్టీ కార్యకర్తలకు ఆమె పిలుపునిచ్చారు.

Like Us on Facebook : https://www.facebook.com/Tupakidotcom/