మహమ్మారి చికిత్స కోసం గుర్రం యాంటీబాడీలు..హైదరాబాద్ శాస్త్రవేత్తల ప్రయత్నం

ఈ మహమ్మారి బాధితుల చికిత్సకు యాంటీబాడీలను వినియోగించవ్చని పలు పరిశోధనల్లో వెల్లడయ్యింది. ఈ నేపథ్యంలో యాంటీబాడీలను గుర్రాల్లో అభివృద్ధి చేయడానికి హైదరాబాద్‌ సెంట్రల్ యూనివర్సిటీ  - సీసీఎంబీ - విన్స్‌ బయోప్రొడక్ట్స్‌ కంపెనీ చేతులు కలిపాయి. ఈ మేరకు సీసీఎంబీ - హెచ్‌ సీయూతో విన్స్‌ బయోప్రొడక్ట్స్‌ సంస్థ మధ్య శుక్రవారం ఒప్పందం కుదిరింది. సీసీఎంబీ డైరెక్టర్‌ రాకేశ్‌ మిశ్రా - హెచ్‌ సీయూ రిజిస్ట్రార్‌ సర్దార్ ‌సింగ్‌ - విన్స్‌ సీఈవో సిద్ధార్థ్‌ ఈ ఒప్పంద పత్రాలపై సంతకాలు చేశారు. ఒప్పందంలో భాగంగా సీసీఎంబీ తరఫున వైరస్‌ కల్చర్‌ ను అందజేయనుండగా.. హెచ్ ‌సీయూ సాంకేతికతను సమకూర్చనుంది. వీటిని ఉపయోగించి గుర్రాలలో యాంటీబాడీలను వృద్ధిచేస్తారు.

వాటిని శుద్ధి చేసి కరోనా బాధితుల చికిత్సకు వినియోగిస్తారు. తక్కువ ఖర్చుతోనే భారీ మొత్తంలో యాంటీబాడీస్‌ ను ఈ విధానంలో వృద్ధి చేయవచ్చని పరిశోధకులు పేర్కొన్నారు. హెచ్‌ సీయూ పరిశోధక బృందానికి యానిమల్‌ బయోటెక్నాలజీ అసోసియేట్ ప్రొఫెసర్ డాక్టర్‌ నూరుద్దీన్‌ ఖాన్‌ - సీసీఎంబీ తరఫున ప్రిన్సిపల్‌ సైంటిస్ట్‌ డాక్టర్‌ కృష్ణన్‌ హరినివాస్‌ - విన్స్‌ కంపెనీ తరఫున డాక్టర్‌ కృష్ణమోహన్‌ నేతృత్వం వహిస్తారు. హెచ్‌ సీయూ వీసీ మాట్లాడుతూ.. ఈ విధానంలో తయారుచేసిన యాంటీ బాడీస్‌ సమర్థంగా పనిచేయడంతోపాటు రోగులపై దుష్ప్రభావాలు చూపవని తెలిపారు.

విన్స్‌ బయోప్రొడక్ట్స్‌ సీఈవో సిద్ధార్థ్‌ దాగా మాట్లాడుతూ.. మూడు సంస్థల్లోని సాంకేతికత - వసతులను వినియోగించుకుని అతి త్వరలోనే యాంటీవైరల్స్‌ ను అందుబాటులోకి తీసుకువస్తామని పేర్కొన్నారు. ప్రజల ప్రాణాలతోపాటు ఆర్ధిక వ్యవస్థను చిన్నాభిన్నం చేస్తున్న ప్రాణాంతక ఈ వైరస్ ‌కు ఇమ్యూనోథెరపీపై ముమ్మరంగా పరిశోధనలు జరుగుతున్నాయి. ఇప్పటికే పలుచోట్ల ప్లాస్మా చికిత్స క్లినికల్ ట్రయల్స్ ప్రారంభమయ్యాయి. ఈ చికిత్స మంచి ఫలితాలనే ఇస్తోంది. దీంతో మరింత ఎక్కువ మందికి ప్లాస్మా చికిత్సను అందజేయాలని భావిస్తున్నారు.