వైఎస్ భారతి.. పులివెందుల అవతలా ప్రచారం!

వైఎస్సార్ కాంగ్రెస్ పార్టీ అధినేత జగన్ మోహన్ రెడ్డి సతీమణి వైఎస్ భారతి పులివెందుల అవతల కూడా ప్రచారం చేపట్టారు.ఇన్నాళ్లూ భారతి ఎన్నికల ప్రచారం చేసినా అది దాదాపుగా పులివెందులకే పరిమితం అయ్యింది.  కడప ఎంపీ సీటు ఉప ఎన్నికలప్పుడు కూడా భారతి పులివెందుల బయట పెద్దగా ప్రచారం చేసిన దాఖలాలు లేవు. అయితే ఇప్పుడు జగన్ సతీమణి జమ్మలమడుగు నియోజకవర్గంలో ప్రచారం చేయడం ఆసక్తిదాయకంగా మారింది.

జమ్మలమడుగులో వైఎస్ భారతి రోడ్ షో నిర్వహించి ఓటు అడిగారు. జమ్మలమడుగు ఎమ్మెల్యేగా సుధీర్ రెడ్డిని గెలిపించాలని - ఎంపీ ఓటును వైఎస్ అవినాష్ రెడ్డికి వేసి గెలిపించాలని ఆమె ఓటర్లను అభ్యర్థించారు. జమ్మలమడుగులో భారతి ప్రచారానికి ఘనస్వాగతమే లభించింది.

వైఎస్సార్ కాంగ్రెస్ పార్టీ అధికారంలోకి వస్తేనే అగ్రిగోల్డ్ బాధితులకు న్యాయం జరుగుతుందని, రాష్ట్ర వ్యాప్తంగా వైఎస్సార్సీపీ ప్రచారానికి మంచి స్పందన లభిస్తోందని ఆమె అన్నారు. చంద్రబాబుపై ప్రజలు విశ్వాసం కోల్పోయారని భారతి వ్యాఖ్యానించారు.

ఒకవైపు పులివెందుల నియోజకవర్గంలో భారతి ఇంటింటి ప్రచారం నిర్వహిస్తూ ఉన్నారు. భర్త గెలుపు అక్కడ ఖాయమే అయినా.. మెజారిటీ పట్టు ఏమీ జారకుండా.. భారతి ఎన్నికల ప్రచారాన్ని నిర్వహిస్తూ ఉన్నారు. కేవలం పులివెందులకే పరిమితం కాకుండా..ఆమె జమ్మలమడుగు నియోజకవర్గంలో కూడా ప్రచారం చేస్తూ ఉండటం గమనార్హం.