బ‌న్నీ... కొత్త సంప్ర‌దాయం

ఇప్ప‌టివ‌ర‌కు టీజ‌ర్ అని మాత్ర‌మే అంటున్నాం...  భ‌విష్య‌త్తులో థియేట్రిక‌ల్ ట్రైల‌ర్‌ లాగా థియేట్రిక‌ల్  టీజ‌ర్ అని కూడా అనాల్సొస్తుందేమో.  బ‌న్నీ ఆ కొత్త సంప్ర‌దాయానికి తెర తీశాడు మ‌రి.  ట్రైల‌ర్ల‌ను మాత్ర‌మే థియేట‌ర్ల‌లో ప్ర‌దర్శిస్తార‌ని మ‌న‌కు తెలుసు. అందుకే వాటిని థియేట్రిక‌ల్ ట్రైల‌ర్లు అని పిలిచారు. అయితే బ‌న్నీ మాత్రం త‌న కొత్త సినిమాకి సంబంధించిన  టీజ‌ర్‌ ని కూడా థియేట‌ర్ల‌లో విడుద‌ల చేసేందుకు సిద్ధ‌మ‌య్యాడు.

బ‌న్నీ క‌థానాయ‌కుడిగా బోయ‌పాటి శ్రీను ద‌ర్శ‌క‌త్వంలో `స‌రైనోడు` తెర‌కెక్కుతోంది. ఈనెల 18న చిత్రాన్ని టీజ‌ర్‌ ని విడుద‌ల చేయ‌బోతున్నారు. బ‌న్నీ టీజ‌ర్ అన‌గానే అభిమానులంతా ఆ రోజు ఇంట‌ర్నెట్‌ కి అతుక్కుపోవాల‌ని ఫిక్స‌య్యారు. కానీ టీజ‌ర్‌ ని థియేట‌ర్ల‌లో కూడా విడుద‌ల చేయాల‌ని బ‌న్నీ నిర్ణ‌యించాడు. అందుకోసం త‌న సొంత నిర్మాణ సంస్థ  గీతాఆర్ట్స్ బృందం ఏర్పాట్లు చేసింది.  తెలుగు రాష్ట్రాల‌తో పాటు బెంగుళూరుతో క‌లిపి మొత్తం వెయ్యి థియేట‌ర్ల‌లో టీజ‌ర్‌ ని విడుద‌ల చేసేందుకు స‌న్నాహాలు చేస్తున్నారు. ఇలా టీజ‌ర్ల‌ని థియేట‌ర్లలో విడుద‌ల చేయ‌డం ఇదే తొలిసారి. ఆ ర‌కంగా ఇది ఓ రికార్డు అని చెప్పొచ్చు.

బ‌న్నీ స‌రైనోడుపై భారీ అంచ‌నాలున్నాయి. బోయ‌పాటి శ్రీనుకి మాస్ ద‌ర్శ‌కుడిగా పేరుంది. ఆయ‌న హీరోయిజంని పీక్స్‌ లో చూపిస్తారు. అందుకే మెగా అభిమానులంతా ఇప్పుడు స‌రైనోడు గురించి ఆస‌క్తిక‌రంగా ఎదురు చూస్తున్నారు. ఇందులో బ‌న్నీ స‌ర‌స‌న ర‌కుల్ ప్రీత్ సింగ్ న‌టించింది. కేథ‌రిన్ మ‌రో క‌థానాయిక‌. వ‌చ్చే వేస‌విలో సినిమాని ప్రేక్ష‌కుల ముందుకు తీసుకొచ్చేందుకు స‌న్నాహాలు చేస్తున్నారు.