థియేటర్‌ లో వెంకీ కన్నీరు..!

సంక్రాంతి కానుకగా ప్రేక్షకుల ముందుకు వచ్చిన 'ఎఫ్‌2' చిత్రం సంచలన విజయాన్ని సొంతం చేసుకుని భారీ వసూళ్లను రాబడుతోంది. సంక్రాంతి విజేతగా 'ఎఫ్‌ 2' నిలిచిందని ఏమాత్రం అనుమానం లేకుండా చెప్పొచ్చు. భారీ విజయం దక్కించుకున్న 'ఎఫ్‌ 2' చిత్ర యూనిట్‌ సభ్యులు సక్సెస్‌ మీట్‌ ను ఏర్పాటు చేశారు. ఈ సక్సెస్‌ మీట్‌ లో చిత్ర యూనిట్‌ సభ్యులతో పాటు, సినీ ప్రముఖులు పాల్గొన్నారు. ఈ సందర్బంగా వెంకటేష్‌ మాట్లాడుతూ కాస్త ఎమోషనల్‌ అయ్యాడు.

ఒకప్పుడు వెంకటేష్‌ సినిమా అంటే ఫ్యామిలీస్‌ తెగ ఎంజాయ్‌ చేసే విధంగా ఉండేవి. కాని గత కొంత కాలంగా వెంకటేష్‌ అలాంటి సినిమాలను ఇవ్వలేక పోయాడు. దాదాపు పది సంవత్సరాల తర్వాత వెంకటేష్‌ నుండి ఆయన మార్క్‌ సినిమా వచ్చిందని ప్రేక్షకుల నుండి టాక్‌ వస్తుంది. ఇక ఈ చిత్రాన్ని థియేటర్‌ లో ప్రేక్షకులతో కలిసి చూసిన సమయంలో వారు ఎంజాయ్‌ చేస్తూ ఉంటే నాకు కళ్ల వెంట నీళ్లు వచ్చాయంటూ వెంకటేష్‌ అన్నాడు.

పదేళ్ల తర్వాత నాకు ఇంత సంతోషంగా ఉందని, ప్రేక్షకులను ఎంటర్‌ టైన్‌ చేసినప్పుడు చాలా సంతోషంగా ఉంటుందని వెంకీ అన్నాడు. ఇకపై వరుగా ఇలాంటి ఫ్యామిలీ ఎంటర్‌ టైన్‌ మెంట్‌ చిత్రాలను చేస్తానంటూ అభిమానులకు వెంకటేష్‌ హామీ ఇచ్చాడు. ఎఫ్‌ 2 చిత్రంతో వెంకీ ఈజ్‌ బ్యాక్‌ అంటూ అభిమానులు కూడా చాలా ఆనందంగా ఉన్నారు. వెంకీ తదుపరి చిత్రం మేనల్లుడు నాగచైతన్యతో వెంకీ మామ గా తెరకెక్కే అవకాశం ఉంది. ఎఫ్‌ 2 చిత్రంలో మరో హీరోగా నటించిన వరుణ్‌ తేజ్‌ కు కూడా ఈ చిత్రం మంచి పేరును తీసుకు వచ్చింది. వెంకీకి మంచి సపోర్టింగ్‌ పాత్రను వరణ్‌ పోషించాడంటూ ప్రశంసలు దక్కాయి.