'జాన్‌' కోసం జగ్గూ భాయ్‌

'సాహో' చిత్రం తర్వాత ప్రభాస్‌ చేస్తున్న చిత్రం 'జాన్‌'. స్టైలిష్‌ డైరెక్టర్‌ గా పేరున్న రాధాకృష్ణ దర్శకత్వంలో ఈ చిత్రం రూపొందుతుంది. ఇప్పటికే కొంత మేరకు షూటింగ్‌ కూడా పూర్తి చేశారు. 1980 నేపథ్యంలో ఒక విభిన్నమైన ప్రేమ కథతో ఈ చిత్రం తెరకెక్కుతుంది. యూరప్‌ లో ఎక్కువగా చిత్రీకరణ జరుపనున్నారు. సాహో సినిమా విడుదల.. ప్రమోషన్స్‌ కారణం వల్ల జాన్‌ కు ప్రభాస్‌ కాస్త గ్యాప్‌ ఇచ్చాడు. సాహో హడావుడి పూర్తి అవ్వడంతో పాటు.. ప్రభాస్‌ రెస్ట్‌ కూడా తీసుకున్నాడు. మళ్లీ జాన్‌ పనిలో బిజీ అవ్వబోతున్నాడు.

జాన్‌ కొత్త షెడ్యూల్‌ అతి త్వరలో ప్రారంభం కాబోతుంది. ఇక త్వరలో ప్రారంభం కాబోతున్న కొత్త షెడ్యూల్‌ లో ప్రభాస్‌ తో పాటు జగపతిబాబు కూడా పాల్గొనబోతున్నాడు. జాన్‌ చిత్రంలో జగపతిబాబును విలన్‌ గా ఎంపిక చేసినట్లుగా తెలుస్తోంది. పెద్ద ఎత్తున అంచనాలున్న ఈ చిత్రంకు విలన్‌ పాత్ర చాలా కీలకంగా ఉంటుందట. రంగస్థలం చిత్రంలో విలన్‌ పాత్రను అద్బుతంగా పండించిన జగపతిబాబుకు ఆ ఛాన్స్‌ ఇవ్వాలని దర్శకుడు రాధాకృష్ణ నిర్ణయించుకున్నాడు.

ఈమద్య కాలంలో జగపతిబాబు నటించిన సినిమాలు మంచి సక్సెస్‌ అవుతున్నాయి. విలన్‌ గా క్యారెక్టర్‌ ఆర్టిస్టుగా కూడా మంచి పాత్రలు చేసిన జగపతిబాబు ప్రస్తుతం పలు చిత్రాల్లో నటిస్తున్నాడు. ఈ సమయంలోనే ఈయనకు జాన్‌ చిత్రంలో కూడా నటించే అవకాశం దక్కింది. భారీ బడ్జెట్‌ తో కృష్ణం రాజు మరియు యూవీ క్రియేషన్స్‌ నిర్మాతలు వంశీ.. ప్రమోద్‌ లు కలిసి నిర్మిస్తున్న ఈ చిత్రం వచ్చే ఏడాది సమ్మర్‌ లో విడుదల చేసే అవకాశం ఉంది. ప్రభాస్‌.. జగపతి బాబు ఢీ కొట్టబోతున్న 'జాన్‌' చిత్రం తెలుగుతో పాటు హిందీ, తమిళంలో కూడా విడుదల కాబోతుంది.