నందమూరి ‘మనం’.. ఆన్ ద వే

‘మనం’ సినిమాలో అక్కినేని ఫ్యామిలీ హీరోలను చూశాక.. తెలుగు సినీ పరిశ్రమలోని మిగతా పెద్ద ఫ్యామిలీలు కూడా తమకూ అలాంటి ఒక సినిమా ఉంటే బాగుండనే అనుకుని ఉంటారు. ఆల్రెడీ దగ్గుబాటి ఫ్యామిలీ అలాంటి ఓ సినిమా కోసం ప్రయత్నాల్లో ఉంది. అది ఎప్పటికి కార్యరూపం దాలుస్తుందో తెలియదు. ఐతే ఈలోపు నందమూరి ‘మనం’ కోసం ప్రయత్నాలు జరుగుతున్నట్లు సమాచారం.

ఐతే నందమూరి ఫ్యామిలీ అనగానే బాలయ్య-ఎన్టీఆర్ కాంబినేషన్ కోసం ఊహించుకోకండి. ఇది హరికృష్ణ ఫ్యామిలీకి మాత్రమే పరిమితమైన సినిమా. గతంలో వైవీఎస్ చౌదరి దర్శకత్వంలో వరుసగా సినిమాలు చేసిన హరికృష్ణ ఈ మధ్య సినిమాలకు పూర్తిగా దూరమైపోయారు. ఆయన మళ్లీ తన ఫ్యామిలీ సినిమా కోసం ముఖానికి రంగేసుకోబోతున్నారట. ఈ సినిమా ఆలోచన ఆయన నుంచే వచ్చిందట. హరికృష్ణ-కళ్యాణ్ రామ్ కాంబినేషన్లో ఈ సినిమా తెరకెక్కే అవకాశముంది. ఇందుకోసం కళ్యాణ్ రామ్ కథ తయారు చేయించే పనిలో ఉన్నాడు. ఈ చిత్రంలో జూనియర్ ఎన్టీఆర్ క్యామియో రోల్ చేసే అవకాశాలున్నాయి.

వచ్చే ఏడాది ఈ సినిమాను పట్టాలెక్కించాలనే ప్రయత్నంలో కళ్యాణ్ రామ్ ఉన్నాడు. ఇంకా ఏదీ మెటీరియలైజ్ అవ్వలేదు కానీ.. ఈ కాంబినేషన్లో సినిమా మాత్రం ఎప్పుడో ఒకప్పుడు ఉంటుందన్నది మాత్రం గ్యారెంటీ అని సమాచారం. ఈలోపు కళ్యాణ్ రామ్ నిర్మాణంలో ఎన్టీఆర్ సినిమా త్వరలోనే సెట్స్ మీదికి వెళ్లనుంది.

Like Us on Facebook : https://www.facebook.com/Tupakidotcom/