ఆ సీత.. మన దగ్గర మెరిసింది తెలుసా?

మదిరాక్షీ ముండ్లే.. ఈ పేరు చెబితే ఎక్కువమందికి తెలీక పోవచ్చు కానీ.. స్టార్ ప్లస్ లో గత రెండున్నర నెలలుగా వస్తున్న సియా కే రామ్ సీరియల్ లో సీత అంటే మాత్రం టక్కుమని గుర్తు పట్టేస్తారు అందరూ. ఈ సీరియల్ లో సీతగా ఈమె యాక్టింగ్ సూపర్ అంటూ ప్రశంసలు ముంచెత్తుతున్నారు చాలా మంది. యాక్టింగ్ లోనే కాదు.. లుకింగ్ విషయంలోనూ మదిరాక్షి చాలా అందంగా ఉందని అంటున్నారు.

అందం - అభినయం రెండూ ఉన్న ముద్దుగుమ్మలు చాలా తక్కువగా ఉంటారు. రాను రానూ రాటు దేలతారేమో కానీ... ప్రారంభంలోనే ఇంతగా ఆకట్టుకోవడం, ప్రేక్షుకుల నుంచి ఇండస్ట్రీ మెప్పు పొందడం అంత సులభమేమీ కాదు. కానీ ఈ భామ హిందీ ఫీల్డ్ కి కొత్తేమో కానీ.. మన టాలీవుడ్ కి పాత బొమ్మే అంటే చాలామందికి తెలీదు. చెప్పినా నమ్మడం కష్టమే కానీ.. ఈమె టాలీవుడ్ ఓ సినిమా కూడా చేసింది. తన అందాలతో తెలుగు ప్రేక్షకులను ఆకట్టుకునే ప్రయత్నం కూడా చేసింది. గతేడాది రిలీజ్ అయిన ఓరి దేవుడోయ్ అనే సినిమాలో హీరోయిన్ గా నటించింది మదిరాక్షి ముండ్లే.

రాజీవ్ సాలూరి హీరోగా నటించిన ఈ సినిమాకి.. ఎన్నారై శ్రీరామ్ వేగిరాజు డైరెక్షన్ చేశాడు. సోషియో ఫాంటసీ కాన్సెప్ట్ తో తెరకెక్కిన ఓరి దేవుడోయ్.. ప్రేక్షకులను ఆకట్టుకోవడంలో విఫలంకావడంతో.. ఎప్పుడొచ్చిందో, ఎప్పుడెళ్లిందో కూడా చాలామందికి తెలీకుండా పోయింది. ఈ దెబ్బతో ఓరి దేవుడోయ్ అనుకుంటా ఇక్కడ జెండా పీకేసిన మదిరాక్షి.. చివరకు బాలీవుడ్ లో ఇలా సీతగా మెప్పిస్తోంది.