అనవసరమైన ఫైట్లు వద్దని చెప్పేశాడట

ఒక ప్రక్కన ''ప్రేమమ్'' మేకర్లు ఎప్పుడైతే తమ సినిమాను సెప్టెంబర్ 9న విడుదల చేస్తామంటూ సెలవిచ్చారో.. వెంటనే దర్శకుడు గౌతమ్ మీనన్ కూడా.. తన సినిమా ''సాహసం శ్వాసగా సాగిపో''ను కూడా అదే రోజున తెస్తున్నట్లు ప్రకటించాడు. దీనితో ఒక్కసారిగా ఈ రెండు సినిమాల హీరో నాగ చైతన్య షాకయ్యాడు. తాను ట్విట్టర్లో ట్వీట్ చేసేవరకు.. తన అభిమానులు ఎవ్వరూ తన సినిమాల రిలీజ్ డేట్ల గురించి నమ్మొద్దని చెప్పేశాడు.

కట్ చేస్తే.. ప్రేమమ్ సినిమా సెప్టెంబర్ లో వస్తుందని చైతన్య స్వయంగా కన్ఫామ్ చేసేశాడు కూడా. అయితే సెప్టెంబర్ 9న వస్తుందా లేకపోతే ఆ తరువాత వారంలో వస్తుందా అనే విషయం మాత్రం ఇంకా తెలియదు. ఇక గౌతమ్ మీనన్ విషయానికొస్తే.. నాగచైతన్య మనోడికి కాస్త గాట్టిగానే జ్ఞానోదయం చేసినట్లు తెలుస్తోంది. తమిళంలో ఇంకా బిజినెస్ పూర్తికాలేదు.. తెలుగులో అంటే ధియేటర్లు దొరుకుతాయి.. కాని అప్పుడు తమిళ వర్షెన్ పై ఆ ప్రభావం పడుతుంది కదా.. అలాగే తమిళంలో ఇంకా శింబు కొన్ని సీన్ల షూటింగుకు కూడా రాలేదు కదా.. మరి తొందర ఎందుకు? అంటూ చైతూ క్లాసిచ్చాడట. నా సినిమాలతోనే ఫైటింగ్ పెట్టుకోవడం వలన అందరూ నష్టపోతారని సెలవిచ్చాడట. మనోడి జోక్యంతో ఇక గౌతమ్ మీనన్ కూడా తన ప్లాన్స్ మార్చుకున్నట్లు తెలుస్తోంది.

బహుశా ఇటు తెలుగు అటు తమిళంలో సాహసం శ్వాసగా సాగిపో సినిమా అక్టోబర్ లో రిలీజవుతుందని అనుకుంటున్నారు. అసలే ఏ మాయ చేశావే కాంబో కావడంతో.. ఈ సినిమాపై కూడా అంచనాలు బాగానే ఉన్నాయి.