యంగ్ హీరో నాగ శౌర్య ఇప్పుడు మంచి జోష్ లోనే ఉన్నాడు. ఛలో సక్సెస్ వచ్చిన హుషారు కుర్రాడిలో కనిపిస్తోంది. మళ్లీ నెల రోజుల గ్యాప్ లోనే ఇంకో సినిమా వచ్చేస్తుండడం.. ఇందులో క్రేజీ బ్యూటీ సాయిపల్లవి హీరోయిన్ గా నటించడం.. కలిసొచ్చే విషయాలుగా చెప్పవచ్చు.
తమిళ్ లో కరు.. తెలుగులో కణం పేర్లతో తెరకెక్కిన మూవీ.. మార్చ్ 3నే విడుదల కావాల్సి ఉంది. కానీ థియేటర్ల స్ట్రైక్ కారణంగా.. కొంతకాలం వాయిదాపడింది. ఇప్పటికే తమిళనాడులో ఈ చిత్రానికి సంబంధించి చెన్నైలో ఓ గ్రాండ్ ఈవెంట్ నిర్వహించగా.. దీనిలో హీరో కనిపించకపోవడం హాట్ టాపిక్ అయింది. ఇప్పుడు కణం మూవీకి ప్రీ రిలీజ్ ఈవెంట్ నిర్వహించేందుకు టీం రెడీ అయింది. మార్చ్ 5న తేదీన.. హైద్రాబాద్ లో ఓ భారీ ఈవెంట్ తలపెట్టారట. లైకా ప్రొడక్షన్స్ వంటి పెద్ద బ్యానర్ కావడంతో.. హంగామా బాగానే ఉంటుంది. కానీ ఈ కార్యక్రమానికి అయినా నాగశౌర్య వస్తాడా లేదా అనే చర్చలు సాగుతున్నాయి.
తనను అత్యధికంగా ఇరిటేట్ చేసిన హీరోయిన్ సాయిపల్లవి అని నాగశౌర్య చెప్పడం.. తనేమీ ఇబ్బంది పెట్టలేదని.. అయినా సరే తన కారణంగా ఇబ్బంది కలిగిందన్న నాగశౌర్య మాటలను గౌరవిస్తున్నట్లు సాయిపల్లవి చెప్పడం జరిగిపోయాయి. మరిప్పుడు ఆ వెర్షన్ కు ఆన్సర్ వచ్చేసింది కాబట్టి.. కణం మూవీ ప్రీ రిలీజ్ ఈవెంట్ కు నాగశౌర్య అటెండ్ అయ్యే అవకాశాలు ఉన్నాయని చెప్పుకుంటున్నారు.