రాజకుమారి అలా.. శమంతకమణి ఇలా

ముందు రిలీజ్ డేట్లు ఇవ్వడం.. తర్వాత మార్చుకోవడం ఈ మధ్య టాలీవుడ్లో మామూలైపోయింది. చిన్న కమ్యూనికేషన్ గ్యాప్ వల్ల నారా రోహిత్ కొత్త సినిమా రెంటినీ ఒకే రోజు విడుదల చేయబోతున్నట్లు వేర్వేరుగా ప్రకటనలు వచ్చాయి. నాగశౌర్య కాంబినేషన్లో రోహిత్ నటించిన ‘కథలో రాజకుమారి’తో పాటు.. ఇంకో ముగ్గురు హీరోలతో కలిసి చేసిన మల్టీస్టారర్ మూవీ ‘శమంతకమణి’ని కూడా జూన్ 30న రిలీజ్ చేయబోతున్నట్లు ప్రకటించారు. కానీ ఈ తేదీకి వీటిలో ఏదీ విడుదల కావట్లేదు. ‘కథలో రాజకుమారి’ 30న పక్కా అనుకుని ‘శమంతకమణి’ని జులై 14కు వాయిదా వేయగా.. ఇప్పుడు ‘కథలో రాజకుమారి’ రిలీజ్ డేట్ కూడా మారిపోయింది. 30వ తేదీకి ఈ సినిమాను విడుదలకు సిద్ధం చేయలేకపోవడంతో జులైకి వాయిదా వేశారు.

‘శమంతకమణి’ జులై 14కు ఫిక్స్ కావడంతో దానికి ముందు.. తర్వాతి వారాల్లో ‘కథలో రాజకుమారి’ని విడుదల చేయట్లేదు. జులై చివరి వారంలో ఈ చిత్రం విడుదలవుతుందట. ఇటు ‘శమంతకమణి’.. అటు ‘కథలో రాజకుమారి’ రెండూ కూడా చక్కటి ప్రోమోలతో జనాల్లో ఆసక్తి రేకెత్తించాయి. రెండు సినిమాల్ని విభిన్నంగా ప్రమోట్ చేస్తున్నారు. కంటెంట్ స్ట్రాంగ్‌ గా ఉన్నట్లు కనిపిస్తున్నాయి ఈ సినిమాలు. గత ఏడాది చివర్లో జ్యో అచ్యుతానంద.. అప్పట్లో ఒకడుండేవాడు సినిమాలతో మంచి విజయాల్ని ఖాతాలో వేసుకున్న రోహిత్.. ఈ ఏడాది కూడా స్వల్ప వ్యవధిలో డబుల్ ధమాకా కొడతాడన్న అంచనాలున్నాయి. మరి రెండు వారాల వ్యవధిలో రాబోతున్న రోహిత్ కొత్త సినిమాలు ఎలాంటి ఫలితాన్నందుకుంటాయో చూద్దాం.

Like Us on Facebook : https://www.facebook.com/Tupakidotcom/