ఎర‌క్క‌పోయి ఇరుక్కుపోయి ఇప్పుడిలా

సోష‌ల్ మీడియా యుగంలో ప్ర‌తిదీ ఒక ప్ర‌హ‌స‌నంలా మారింది. ఏది మాట్లాడాల‌న్నా ఒళ్లు ద‌గ్గ‌ర పెట్టుకుని మాట్లాడాల్సొస్తోంది. పొర‌పాటున నోరు జారితే అది కాస్తా విపరీత అర్థాల‌కు తావిస్తోంది. ప‌నిలోప‌నిగా వీరాభిమానుల వీరంగం హ‌ద్దులు దాటిపోవ‌డం చిక్కులు తెస్తోంది. ఎంత పెద్ద స్టార్ కి అయినా.. సెల‌బ్రిటీకి అయినా చెమ‌ట‌లు ప‌ట్టించేస్తున్నారు నెటిజ‌నం. బూతు ప‌ద‌జాలంతో తిట్టేయ‌డం.. ఇష్టానుసారం వాగ‌డం ఈ వేదిక‌పై చాలా సులువుగా సాగిపోతోంది. ఒక్కోసారి ఫ్యాన్స్ వెర్రి వేషాల‌కు అడ్డుక‌ట్ట వేయక‌పోతే అది కాస్తా అదుపు త‌ప్పి సీన్ ఎటో వెళుతోంది.

తాజాగా ఈ బాప‌తు వ్య‌వ‌హారంలోనే ట్యాలెంటెడ్ కొరియోగ్రాఫ‌ర్ .. హీరో కం డైరెక్ట‌ర్ రాఘ‌వ లారెన్స్ బుక్క‌య్యారు. ఒకానొక వేదిక‌పై లారెన్స్ మాట్లాడిన ఓ మాట క‌మ‌ల్ హాస‌న్ ఫ్యాన్స్ లో హాట్ టాపిక్ అయ్యింది. ర‌జ‌నీపై అభిమానం కురిపిస్తూ క‌మ‌ల్ హాస‌న్ వాల్ పోస్ట‌ర్ల‌పై పేడ కొట్టిన విష‌యాన్ని నోరు జారి ఆ త‌ర్వాత నాలుక క‌రుచుకున్నాడు లారెన్స్. తాను తెలియ‌క అమాయ‌క‌త్వంతో చేసిన ప‌ని అద‌ని క‌మ‌ల్ అభిమానుల్ని వారించాల‌ని చూసినా అప్ప‌టికే ప‌రిస్థితి అదుపు త‌ప్పింది.

లారెన్స్ పై క‌మ‌ల్ ఫ్యాన్స్ బూతుల పంచాంగం అందుకోవ‌డ‌మే గాక‌.. దురుసైన వ్యాఖ్య‌ల‌తో ట్రోలింగ్స్ చేశారు. దీంతో ప‌రిస్థితిని అదుపు చేసేందుకు ఏకంగా లారెన్స్ దిగొచ్చి నేరుగా క‌మల్ హాస‌న్ నే క‌లిశారు. ఆయ‌న‌తో పాటు దిగిన ఓ ఫోటోని తాజాగా అభిమానుల‌కు షేర్ చేశారు. ఈ ఎపిసోడ్ లో లారెన్స్ మాస్టార్ .. త‌ప్ప‌యిపోయింది మ‌హా ప్ర‌భో! అని కాళ్లు ప‌ట్టుకున్నంత ప‌నే చేశారని తాజాగా రివీలైన ఫోటో చెబుతోంది. క‌మ‌ల్ హాస‌న్ చేతులు ప‌ట్టుకుని లారెన్స్ ప్రాధేయ ప‌డ్డాడ‌ని అర్థ‌మ‌వుతోంది. అయితే ఇండ‌స్ట్రీ దిగ్గజాలంద‌రితో లారెన్స్ స్నేహం గురించి చెప్పాల్సిన ప‌నేలేదు. త‌న‌ని అన్నంత మాత్రాన లారెన్స్ ని క‌మ‌ల్ హాస‌న్ త‌ప్పుగా అర్థం చేసుకోలేదు. ఫ్యాన్స్ మాత్రమే తేడాగా అర్థం చేసుకున్నార‌ని ఈ ఎపిసోడ్ చెబుతోంద‌న్న‌మాట‌