లక్కీ బ్యూటీ మరో బాలీవుడ్ ఛాన్స్ కొట్టేసిందా..?

'కిర్రిక్ పార్టీ' అనే కన్నడ సినిమాతో సినీ ఇండస్ట్రీలో అడుగుపెట్టిన రష్మిక మందన్న.. తెలుగులో నటించిన 'ఛలో' సినిమాతో ఛలోమంటూ దూసుకుపోతోంది. ప్రస్తుతం తెలుగు, తమిళ చిత్రాలతో పాటు కన్నడలోనూ సినిమాలు చేస్తున్న ఈ శాండిల్‌ వుడ్‌ బ్యూటీ అనతికాలంలోనే భారీ ఫాలోయింగ్ సంపాదించుకుంది. సూపర్ స్టార్‌ మహేశ్‌ బాబుతో 'సరిలేరు నీకెవ్వరు'లో నటించి బ్లాక్‌ బస్టర్‌ హిట్‌ తన ఖాతాలో వేసుకుంది. అలానే నితిన్ తో చేసిన 'భీష్మ' సినిమాతో ఈ ఏడాది రెండో హిట్ అందుకుంది. తెలుగులో రెండు బ్యాక్ టూ బ్యాక్ హిట్స్ అందుకున్న రష్మిక వరుస ఆఫర్స్ తో బిజీగా మారిపోయింది. ఈ క్రమంలో బాలీవుడ్ నుంచి కూడా ఆమెకు పిలుపు అందింది.

ఇప్పటికే బాలీవుడ్ హీరో సిద్ధార్థ్ మల్హోత్రా సరసన 'మిష‌న్ మ‌జ్ను' సినిమాలో హీరోయిన్‌ గా ఛాన్స్ దక్కించుకున్న ఈ లక్కీ బ్యూటీ.. తాజాగా మరో బాలీవుడ్ ఆఫర్ అందుకుందని తెలుస్తోంది. వికాస్ భల్ దర్శకత్వంలో బిగ్ బీ అమితాబ్ ప్రధాన పాత్రలో 'డెడ్లీ' అనే సినిమా రూపొందుతోంది. తండ్రీకూతుళ్ళ మధ్య భావోద్వేగాల నేపథ్యంలో తెరకెక్కనున్న ఈ చిత్రంలో అమితాబ్ కూతురిగా రష్మిక కనిపించనుందట. ఇందులో నిజమెంతో తెలియాలంటే అధికారిక ప్రకటన వచ్చే వరకు ఆగాల్సిందే. ఇకపోతే రష్మిక మందన్న తెలుగులో అల్లు అర్జున్ తో కలిసి 'పుష్ప' అనే పాన్ ఇండియా సినిమాలో నటిస్తోంది. అలానే యువ హీరో శర్వానంద్ సరసన 'ఆడాళ్లు మీకు జోహార్లు' అనే సినిమా చేయనుంది. తమిళ్ లో కార్తీతో కలిసి నటించిన 'సుల్తాన్' సినిమా రిలీజ్ కి రెడీ అవుతోంది. మొత్తం మీద దక్షిణాదితో పాటు హిందీ సినిమా ఆఫర్లు కూడా దక్కించుకుంటున్న రష్మిక పాన్ ఇండియా స్టార్ గా మారనుందని ఫ్యాన్స్ భావిస్తున్నారు.