నివేదా.. రెజీనాకు ప‌నిష్మెంట్‌

తెలుగులో విభిన్న చిత్రాలు ప‌రంప‌ర మొద‌లైంది. కొత్త త‌ర‌హా క‌థ‌ల్ని ప్రేక్ష‌కులు ఆద‌రిస్తుండ‌టంతో ద‌ర్శ‌కులు ఆ త‌ర‌హా సినిమాల‌కు ప్ర‌ధాన ప్రాధాన్య‌త నిస్తున్నారు. ఇదే కోవ‌లో వైవిధ్య‌మైన క‌థాంశంతో రూపొందుతున్న చిత్రం `శాకిని డాకిని`. రెజీనా, నివేదా థామ‌స్ కీల‌క పాత్ర‌ల్లో న‌టిస్తున్నారు. సురేష్ ప్రొడ‌క్ష‌న్స్‌, గురు పిక్చ‌ర్స్,క్రాస్ పిక్చ‌ర్స్ బ్యాన‌ర్ ల‌పై డి. సురేష్ బాబు, సునీత తాటి, హ్యూన్ వ్యూ  సంయుక్తంగా నిర్మిస్తున్న ఈ చిత్రానికి సుధీర్ వ‌ర్మ ద‌ర్శ‌క‌త్వం వ‌హిస్తున్నారు. సోమ‌వారం హీరోయిన్ రెజీనా పుట్టిన రోజు సంద‌ర్భంగా చిత్ర బృందం ఈ చిత్రంలోని రెజీనా, నివేదా థామ‌స్ ల‌కు సంబంధించిన ఫ‌స్ట్ లుక్ పోస్ట‌ర్ ని రిలీజ్ చేసింది.

ఈ పోస్ట‌ర్ లో రెజీనా, నివేదా థామ‌స్ ఇద్ద‌రూ మిల‌ట‌రీ యూనిఫామ్ లో క‌నిపిస్తున్నారు. ట్రైనింగ్ లో ఏదో త‌ప్పుచేసిన వారిని దండిస్తూ ఎవ‌రో నివేదాకు పంచ్ రెజీనా చెవి మెలిపెడూ ప‌నిష్మెంట్ ఇస్తున్న‌ట్టుగా క‌నిపిస్తోంది. ఫ‌స్ట్ లుక్ లోనే అల్ల‌రి చేస్తూ దొరికి పోయిన హీరోయిన్ లు సినిమా లో ఏ రేంజ్‌లో సంద‌డి చేస్తారో అని అంతా ఆస‌క్తిగా ఎదురుచూస్తున్నారు. ఈ చిత్రంలో ఈ ఇద్ద‌రిపై చిత్రీక‌రించిన యాక్ష‌న్ ఘ‌ట్టాలు హైలైట్ గా నిలుస్తాయ‌ట‌. ఈ చిత్రాన్ని కొరియ‌న్ మూవీ `మిడ్ నైట్ ర‌న్న‌ర్స్` ఆధారంగా తెర‌కెక్కిస్తున్నారు.

గ‌తంలో `మిస్ గ్రానీ` క‌థ‌ని తెలుగులో `ఓ బేబీ`గా స‌మంత‌తో రీమేక్ చేసి సూప‌ర్ హిట్ ని సొంతం చేసుకున్న నిర్మాత‌లు తాజాగా `మిడ్ నైట్ ర‌న్న‌ర్స్ ` ని తెలుగులో `శాకిని డాకిని` గా రీమేక్ చేస్తుండ‌టం ఆస‌క్తిని రేకెత్తిస్తోంది. `మిస్ గ్రానీ` త‌ర‌హాలో `మిడ్ నైట్ ర‌న్న‌ర్స్ ` యూనివ‌ర్స‌ల్ క‌థ కావ‌డంతో ఈ సినిమాపై కూడా మేక‌ర్స్ భారీ అంచ‌నాలు పెట్టుకున్నార‌ట‌. గ్లోబ‌ల్ అప్పీల్ వున్న క‌థ కావ‌డంతో తెలుగు ప్రేక్ష‌కుల‌కు త‌ప్ప‌కుండా క‌నెక్ట్ అవుతుంద‌ని ద‌ర్శ‌కుడు చెబుతున్నాడు. ప్ర‌స్తుతం ఈ చిత్రానికి సంబంధించిన షూటింగ్ పూర్త‌యింది. చిత్ర బృందం పోస్ట్ ప్రొడ‌క్ష‌న్ కార్య‌క్ర‌మాల్లో బిజీగా వుంది. ఈ చిత్రానికి రిచ‌ర్డ్ ప్ర‌సాద్ కెమెరా, మిక్కీ మెల్కేరీ సంగీతం అందిస్తున్నారు.