తమన్ గాలి తీసేశావ్ కదా తేజూ..

కొంత కాలం కిందట ఓ ప్రముఖ ఇంగ్లిష్ పత్రిక తెలుగు సంగీత దర్శకులు కాపీ చేసిన పాప్ సాంగ్స్ ట్యూన్ల గురించి ఓ పెద్ద ఆర్టికల్ వేసింది. అందులో తమన్ పేరు టాప్‌ లో వచ్చింది. అతడివే ఐదారు పాటలు ఆ జాబితాలో కనిపించాయి. స్పీడుగా పని పూర్తి చేస్తాడని.. మాంచి బీటున్న పాటలు ఇస్తాడని ఇండస్ట్రీలో మంచి పేరైతే ఉంది కానీ.. కాపీ మాస్టర్ అన్న చెడ్డ పేరూ ఉంది తమన్ కు. ఐతే సామాన్య జనాలు ఏమనుకున్నా.. ఇండస్ట్రీ వాళ్లు ఎవ్వరూ తమన్ గురించి ఎలాంటి వ్యాఖ్యలు చేయరు. అలాంటిది.. ‘తిక్క’ ఆడియో వేడుకలో చెప్పకూడని ఓ రహస్యం చెప్పి తమన్ గాలి తీసేశాడు సాయిధరమ్ తేజ్.

తన ప్రసంగంలో తమన్ ప్రస్తావన వచ్చినపుడు తమ పరిచయం గురించి గుర్తు చేసుకున్నాడు సాయిధరమ్. క్రికెట్ గ్రౌండ్లో అనుకోకుండా తామిద్దరం కలిశామని చెప్పిన సాయిధరమ్.. హలో హాయ్ అనుకున్నాక.. తమన్ చేసిన ఓ ట్యూన్ అంతకుముందు వచ్చిన ఓ సినిమాలోంచి యాజిటీజ్ దించేసినట్లుంది అని చెప్పినట్లు వెల్లడించాడు. సాయిధరమ్ ఈ మాట అనగానే తమన్ గట్టిగా నవ్వేశాడు. ఐతే తాను ఆ మాట అన్నప్పటికీ తమన్ చాలా స్పోర్టివ్ గా తీసుకున్నాడని.. తప్పనిసరి పరిస్థితుల్లో కొందరి డిమాండ్ మేరకు అలా చేయాల్సి వచ్చిందని తమన్ తనకు చెప్పినట్లు సాయిధరమ్ అన్నాడు. ఏదేమైనా ఇలాంటి అంతర్గత విషయాల్ని లోలోన దాచుకుంటేనే బెటర్. తమన్ ఎంత స్పోర్టివ్ అయినా సరే.. ఓపెన్ గా వేదికలెక్కి ఇలాంటి విషయాలు చెప్పేస్తే ఇబ్బందే.