ఎమ్మెస్ కూతురు.. రవిరాజా కొడుకు

ఎమ్మెస్ నారాయణ నట వారసత్వాన్ని కొనసాగిస్తూ నటుడిగా అరంగేట్రం చేశాడు విక్రమ్. కానీ అతను సక్సెస్ కాలేకపోయాడు. ఇక ఎమ్మెస్ కూతురు శశికిరణ్ కూడా సినిమాల్లోకే అడుగుపెట్టింది. కాకపోతే దర్శకురాలిగా. ఆమె తొలి సినిమా ‘సాహెబా సుబ్రమణ్యం’ మంచి సినిమాగా పేరు తెచ్చుకుంది కానీ.. ప్రేక్షకాదరణకు నోచుకోలేదు. అయినా నిరాశ చెందకుండా తన రెండో సినిమా మీద దృష్టిపెట్టింది శశికిరణ్. ఆమె ప్రయత్నం ఫలించి ఓ పేరున్న హీరోతోనే సినిమా చేసే అవకాశం అందుకుంది. ఆ హీరో మరెవరో కాదు.. రవిరాజా పినిశెట్టి తనయుడు ఆది పినిశెట్టి.

‘ఒక విచిత్రం’తో హీరోగా పరిచయమై.. ఆ తర్వాత తమిళంలోకి వెళ్లిపోయి అక్కడ మంచి పేరు తెచ్చుకున్న ఆది.. ఆ తర్వాత తిరిగి తెలుగులో ‘గుండెల్లో గోదారి’ చేశాడు. కానీ ఫలితం లేకపోయింది. ఐతే ‘సరైనోడు’ సినిమాలో నెగెటివ్ రోల్ ద్వారా ఆది తెలుగు ప్రేక్షకుల మనసుల్లోకి దూసుకెళ్లాడు. ఈ సినిమా తర్వాత చాలా అవకాశాలు వస్తున్నాయి ఆదికి. ఐతే పాత్రల ఎంపికలో సెలెక్టివ్ గా ఉంటున్న ఆది.. శశికిరణ్ చెప్పిన కథకు ఓటేశాడు. ఒక సీనియర్ నటుడి కూతురు.. మరో సీనియర్ దర్శకుడి కొడుకు కలిసి చేయబోతున్న ఈ సినిమా ఆసక్తి రేకెత్తించేదే. ఈ సినిమా ఏడాది ఆఖర్లో సెట్స్ మీదికి వెళ్లనుంది. పూర్తి వివరాలు త్వరలోనే వెల్లడవుతాయి.

Like Us on Facebook : https://www.facebook.com/Tupakidotcom/