కొత్త సినిమా.. నువ్వు తోపురా

శేఖర్ కమ్ముల ‘లైఫ్ ఈజ్ బ్యూటిఫుల్’ సినిమాలో నాగరాజ్ పాత్రలో సహజమైన నటనతో ఆకట్టుకున్న కుర్రాడు గుర్తున్నాడా? ఆ కుర్రాడి పేరు.. సుధాకర్ కోమకుల. ‘లైఫ్ ఈజ్ బ్యూటిఫుల్’తో మంచి పేరు సంపాదించినప్పటికీ.. ఆ సినిమా ఆడకపోవడంతో సుధాకర్ కెరీర్ జోరందుకోలేదు. దాని తర్వాత రెండు మూడు సినిమాల్లో నటించినప్పటికీ అవి కూడా అతడికి బ్రేక్ ఇవ్వలేదు. ఐతే ఇప్పుడు సుధాకర్ లీడ్ రోల్ లో ఓ సినిమా తెరకెక్కుతుండటం విశేషం. అది యుఎస్ బ్యాక్ డ్రాప్ లో తెరకెక్కుతుండటం.. దాని మీద నిర్మాతలు చెప్పుకోదగ్గ స్థాయిలోనే ఖర్చు కూడా పెడుతుండటం గమనార్హం.

సుధాకర్ హీరోగా నటిస్తున్న ఆ సినిమా పేరు.. ‘నువ్వు తోపు రా’. ఈ టైటిల్లో ‘నువ్వు’.. ‘తోపు’.. ‘రా’ అనే పదాల ఇంగ్లిష్ అక్షరాల్ని సంక్షిప్త రూపంలో రాస్తే ‘ఎన్.టి.ఆర్.’ అని వస్తుండటం విశేషం. ‘నెసిసిటీ ఈజ్ మదర్’ అంటూ దీనికి పెట్టిన క్యాప్షన్ కూడా ‘ఎన్.టి.ఆర్’ అనే సంక్షిప్త రూపాన్ని సూచించేదే కావడం గమనార్హం. ఇది ఈ సినిమా ప్రచారానికి.. జనాల్ని ఆకర్షించడానికి బాగా ఉపయోగపడే విషయమే. ఈ చిత్ర ఫస్ట్ లుక్ పోస్టర్ కూడా ఆసక్తికరంగానే ఉంది. హరినాథ్ బాబు అనే కొత్త దర్శకుడు ఈ చిత్రాన్ని రూపొందిస్తున్నాడు. ఇది యుఎస్ నేపథ్యంలో తెరకెక్కే థ్రిల్లర్ మూవీ అంటున్నారు. హై టెక్నికల్ వాల్యూస్ తో.. కొంచెం ఎక్కువ బడ్జెట్లోనే సినిమా తెరకెక్కిస్తున్నారట.

Like Us on Facebook : https://www.facebook.com/Tupakidotcom/