ఆ సినిమాలో మెగాస్టార్ సరసన హీరోయిన్ లేదట!

టాలీవుడ్ ఇండస్ట్రీలో మెగాస్టార్ సినిమాల రూటే వేరు. అందుకే ఆయన సినిమాలకు క్రేజ్ కూడా అదే రేంజిలో ఉంటుంది. మెగాస్టార్ చిరు ప్రస్తుతం స్టార్ డైరెక్టర్ కొరటాల శివ దర్శకత్వంలో ఆచార్య సినిమా చేస్తున్న సంగతి తెలిసిందే. గతనెలలో ఆచార్య సినిమా టీజర్ రిలీజ్ చేసి ట్రీట్ ఇచ్చారు. అదేవిధంగా ఆచార్య మూవీని మే 13న విడుదల చేయనున్నట్లు కూడా ప్రకటించేసారు. ఇదంతా బాగానే ఉంది. కానీ చిరు నటించబోయే తదుపరి సినిమా గురించి ఇప్పుడు ఇండస్ట్రీలో చర్చలు నడుస్తున్నాయి. మెగాస్టార్ ఆచార్య తర్వాత లూసిఫర్ సినిమాలో నటించనున్నాడు. నామమాత్రంగా ఇప్పటికి అదే టైటిల్ కంటిన్యూ అవుతోంది. తర్వాత మార్చుతారో లేదో తెలియదు. ఈ సినిమా ఒరిజినల్ మలయాళం లూసిఫర్.

ఈ రీమేక్ సినిమాకు తమిళ దర్శకుడు మోహన్ రాజా దర్శకత్వం వహించనున్నాడు. ఇప్పటికే స్క్రిప్ట్ పనులు కూడా పూర్తి చేసినట్లు తెలుస్తుంది. ఏప్రిల్ నెలలో షూటింగ్ ప్రారంభం చేసే ఆలోచనలో ఉన్నట్లు టాక్. తాజాగా ఈ సినిమాలో హీరోయిన్ క్యారెక్టర్ గురించి వార్తలొస్తున్నాయి. నిజానికి ఒరిజినల్ లూసిఫర్ లో హీరోయిన్ లేదు. మెగాస్టార్ చిరు డిమాండ్ మేరకు హీరోయిన్ క్యారెక్టర్ డిజైన్ చేసాడట డైరెక్టర్. ఒకవేళ హీరోయిన్ క్యారెక్టర్ ఉన్నా ఎంత నిడివితో ఉంటుంది.. పాటల వరకే అంకితం అవుతుందా అనే సందేహాలు వ్యక్తమయ్యాయి. కానీ ఈ సినిమాలో లేదనేది తాజా వార్త. స్వయంగా మెగాస్టార్ చిరంజీవి హీరోయిన్ వద్దు. ఒరిజినల్ లో లేనట్లే మనం కూడా చేసేద్దాం.. అని దర్శకుడితో అన్నాడట. ప్రస్తుతం మోహన్ రాజా కూడా హీరోయిన్ క్యారెక్టర్ లేకుండా స్క్రిప్ట్ రెడీ చేసినట్లు సమాచారం.