#టికెట్ గొడ‌వ‌.. మెగా ఫ్యాన్స్ వ‌ర్సెస్ అల్లు ఫ్యాన్స్

స్టైలిష్ స్టార్ అల్లు అర్జున్ న‌టించిన పుష్ప పాన్ ఇండియా కేట‌గిరీలో ప‌లు భాష‌ల్లో అత్యంత భారీగా విడుద‌లైన సంగ‌తి తెలిసిందే. భారీ హైప్ న‌డుమ విడుద‌లైన ఈ చిత్రానికి ఆరంభం డివైడ్ టాక్ వ‌చ్చింది. అయినా బ‌న్ని వ‌న్ మ్యాన్ షోపై ప్ర‌శంస‌లు కురువ‌డంతో అభిమానులు థియేట‌ర్ల‌కు పోటెత్తుతున్నారు. తొలి వీకెండ్ వ‌సూళ్ల‌కు ఎలాంటి డోఖా ఉండ‌ద‌ని విశ్లేష‌ణ సాగుతోంది.

మ‌రోవైపు థియేట‌ర్ల ముందు ఫ్యాన్స్ మ‌ధ్య గొడ‌వ‌లు ఇప్పుడు టాక్ ఆఫ్ ది టౌన్ గా మారాయి. మెగా ఫ్యాన్స్ వ‌ర్సెస్ అల్లు ఫ్యాన్స్ వివాదం తాజాగా హాట్ టాపిక్ గా మారింది. నంద్యాల్ లోని ప్ర‌తాప్ మినీ థియేట‌ర్ వ‌ద్ద ఇరువ‌ర్గాల ఫ్యాన్స్ మ‌ధ్య ఘ‌ర్ష‌ణ వాతావ‌ర‌ణం నెల‌కొన‌డంతో ప‌ట్ట‌ణ పోలీస్ రంగంలోకి దిగాల్సి వ‌చ్చింది.

మెగా ఫ్యాన్స్ కి ఎక్కువ టిక్కెట్లు ఇచ్చార‌ని త‌మ‌కు త‌క్కువ టిక్కెట్లు ద‌క్కాయ‌ని అల్లు ఫ్యాన్స్ ఘ‌ర్ష‌ణ‌కు దిగారు. మెగా ఫ్యాన్స్ టౌన్ అధ్య‌క్షుడు ల‌క్ష్మీ కాంత్ ఫ్లెక్సీని బ‌న్ని అభిమానులు చింపేయ‌డంతో గొడ‌వ పెద్ద‌దైంది. చివ‌రికి పోలీసులు ఆందోళ‌న కారుల‌ను వ‌న్ టౌన్ పోలీస్ స్టేష‌న్ కి త‌రలించార‌ని తెలిసింది.

ఫ్యాన్స్ మ‌ధ్య ఇటీవ‌లి కాలంలో ఇలాంటి గొడ‌వ‌ల్లేవ్. చాలా కాలానికి పుష్ప‌కి ఉన్న హైప్ దృష్ట్యా స‌ద‌రు థియేట‌ర్ వ‌ద్ద‌ ఫ్యాన్స్ మ‌ధ్య గొడ‌వ‌లు చెల‌రేగాయ్. అభిమాన సంఘాల‌కు హీరోలు కొన్ని టిక్కెట్ల‌ను అందుబాటులో ఉంచుతార‌న్న సంగ‌తి తెలిసిందే. పుష్ప చిత్రం తెలుగు రాష్ట్రాలు స‌హా అమెరికా... త‌మిళ‌నాడులోనూ భారీగా రిలీజైంది. డే-వ‌న్ వ‌సూళ్ల గురించి పూర్తి వివ‌రాలు వెల్ల‌డి కావాల్సి ఉంటుంది.