అఖిల్ మూవీకి సూపర్ స్టార్ ఓకే చెప్తాడా..??

అక్కినేని అఖిల్ ప్రస్తుతం మోస్ట్ ఎలిజిబుల్ బ్యాచిలర్ సినిమాను విడుదలకు సిద్ధం చేస్తున్నాడు. గతేడాది కాలంగా బ్యాచిలర్ సినిమా విడుదల గురించి అక్కినేని హీరో ఎదురుచూస్తున్నాడు. మధ్యలో చాలావరకు రీషూట్ చేసారని.. అందుకే సినిమా విడుదల ఇంతగా ఆలస్యం అయిందని చెప్పారు. మోస్ట్ ఎలిజిబుల్ బ్యాచిలర్ పై అఖిల్ చాలా ఆశలే పెట్టుకున్నాడు. ఎందుకంటే కెరీర్ పరంగా ఇంతవరకు హిట్ రుచి చూడలేదు అఖిల్. అందుకే ఎలిజిబుల్ బ్యాచిలర్ తో ఎలాగైనా బోణి కొట్టాలని ఉత్సాహంగా ఉన్నాడు. ఈ సినిమాకు బొమ్మరిల్లు భాస్కర్ దర్శకత్వం వహిస్తున్నాడు. ప్రస్తుతం భాస్కర్ కూడా హిట్టు కోసమే తపిస్తున్నాడు. ఈ సినిమాలో అఖిల్ జోడిగా పూజాహెగ్డే కనిపించనుంది.

ఇదిలా ఉండగా.. అఖిల్ తదుపరి సినిమాను డైరెక్టర్ సురేందర్ రెడ్డితో చేయనున్న సంగతి తెలిసిందే. ఇప్పుడు అఖిల్ ఆ సినిమా కోసం కూడా రెడీ అవుతున్నాడు. గుర్రపుస్వారీ కూడా శిక్షణ తీసుకుంటున్నాడట. సైరా నరసింహరెడ్డి సినిమా తర్వాత సురేందర్ రెడ్డి నుండి ఏ సినిమా రాలేదు. ప్రస్తుతం అఖిల్ తో ఓ మాస్ ఫిల్మ్ తెరకెక్కించే ప్లాన్ లో ఉన్నాడట. అయితే ఈ సినిమాలో భారీ తారాగణం నటించే సూచనలున్నాయి. ఎందుకంటే ప్రస్తుతం సురేందర్ రెడ్డి టీమ్ అఖిల్ సినిమా కోసం మలయాళ సూపర్ స్టార్ మోహన్ లాల్ ను ఓ కీలకపాత్రకోసం సంప్రదించడం జరిగింది. మరి వీరి సినిమాకు ఆయన ఓకే చెప్తాడో లేదో తెలియదు. కానీ మోహన్ లాల్ ప్రస్తుతం చేతినిండా మలయాళం సినిమాతో బిజీగా ఉన్నాడు. ఇదివరకు జనతాగ్యారేజ్, మనమంతా సినిమాలలో నటించాడు. మరిప్పుడు అఖిల్ సినిమాకు ఓకే అంటాడా లేదా చూడాలి. ఈ సినిమాను ఏకే ఎంటర్టైన్మెంట్స్ పై అనిల్ సుంకర నిర్మించనున్నాడు.