ప్రపంచ కప్ 2023 ఫైనల్‌లో నాని తెలివైన ప‌ని
ఇంత‌కీ నాని అక్క‌డ సల్మాన్ ని ఎందుకు క‌లిసాడు? అంటే దీనికి ఒక ప్ర‌త్యేక కార‌ణం ఉంది.
ఇండియా వ‌ర్సెస్ ఆస్ట్రేలియా క్రికెట్ ప్రపంచ కప్ 2023 ఫైనల్ వేదిక‌గా టైగర్ సల్మాన్ ఖాన్‌తో నేచురల్ స్టార్ నాని ఇంట‌రాక్షన్ అభిమానుల్లో సందడి పెంచింది. ఇంత‌కీ నాని అక్క‌డ సల్మాన్ ని ఎందుకు క‌లిసాడు? అంటే దీనికి ఒక ప్ర‌త్యేక కార‌ణం ఉంది.
నేచురల్ స్టార్ నాని తన పాన్ ఇండియా సినిమా `హాయ్ నాన్నా`ని టీమ్‌తో కలిసి తీవ్రంగా ప్రమోట్ చేస్తున్నాడు. ఈ చిత్రం డిసెంబర్ 7న ప్రేక్షకుల ముందుకు రానుంది. ఈరోజు, ఇండియా Vs ఆస్ట్రేలియా క్రికెట్ వరల్డ్ కప్ ఫైనల్ మ్యాచ్ షోలో స్టార్ స్పోర్ట్స్ (తెలుగు)లో నాని కనిపించాడు. స్టార్ స్పోర్ట్స్ హిందీ ఛానెల్‌లో కనిపించిన బాలీవుడ్ స్టార్ సల్మాన్ ఖాన్‌ను కలిశారు. ఇద్దరు స్టార్‌లను ఒక ఫ్రేమ్‌లో చూడటం అభిమానుల్లో ఆనందం నింపింది. ఇక స్పాట్ లో సల్మాన్ భాయ్ న‌వ్వులు చిందిస్తూ నానీతో ముచ్చట క‌లిపారు.
తాజాగా హీరో నాని టీమ్ షేర్ చేసిన ఫోటో, వీడియోలో రాజకీయ నాయకుడిగా కనిపించాడు. హాయ్ నాన్నా ప్రచారంలో భాగంగా తన రాజకీయ పార్టీ మేనిఫెస్టోను ఆయన ప్రకటించారు. ఈ వీడియో సోషల్ మీడియాలో వైరల్‌గా మారింది. అందరూ ఈ ఆలోచనను మెచ్చుకున్నారు. సినిమాను ప్రమోట్ చేయడానికి నాని అండ్ టీమ్ ప్ర‌య‌త్నాలు ఆక‌ట్టుకుంటున్నాయి. ఇప్పుడు క్రికెట్ వేదిక‌గా హాయ్ నాన్న ప్ర‌చారం సరైన విధానం అని ప్రశంస‌లు కురిసాయి.
జెర్సీ ధరించి వ‌చ్చాడు:
టాలీవుడ్ నేచురల్ స్టార్ నాని క్రికెట్ నేప‌థ్యంలో `జెర్సీ` అనే సినిమాలో న‌టించాడు. ఆ చిత్రానికి జాతీయ అవార్డ్ సైతం ద‌క్కింది. ఇప్పుడు టీమ్ ఇండియాకు మద్దతును తెలియజేయడానికి స్టార్ స్పోర్ట్స్ తెలుగు వేదికపైకి అడుగుపెట్టాడం అంద‌రినీ ఆక‌ర్షించింది. ఐకానిక్ టీమ్ ఇండియా జెర్సీని ధరించి, ప్రపంచ కప్ ఫైనల్స్‌లో ఆస్ట్రేలియాపై భారత్ విజయంపై నాని విశ్వాసం వ్యక్తం చేశాడు. కానీ టీమిండియా ప‌రిమిత స్కోర్ చేయ‌డం నిరాశ‌ప‌రిచింది. ప్ర‌స్తుతం ఆసీస్ క‌డ‌ప‌టి వార్త‌లు అందేస‌రికి 100ప‌రుగుల‌కు 3 వికెట్ల‌తో గేమ్ని సాగిస్తోంది.
హాయ్ నాన్న‌లో నాని స‌ర‌స‌న మృణాల్ ఠాకూర్ క‌థానాయిక‌గా న‌టించింది. శౌర్యువ్ దర్శకత్వం వహించిన సినిమా విజువ‌ల్స్ ఇప్ప‌టికే ఆక‌ట్టుకున్నాయి. ఈ చిత్రం తండ్రీ-కూతుళ్ల న‌డుమ అనుబంధం, సంబంధాల్లో చిక్కుముడుల‌పై ఆద్యంతం ఆస‌క్తిని క‌లిగిస్తుంద‌ని స‌మాచారం. వైరా ఎంటర్‌టైన్‌మెంట్స్ బ్యానర్‌పై డైనమిక్ ద్వయం మోహన్ చెరుకూరి (సివిఎం)- డాక్టర్ విజయేందర్ రెడ్డి తీగల నిర్మించారు. 7 డిసెంబరు 2023న హాయ్ నాన్నా విడుదలవుతోంది. ఈ స‌మ‌యంలో అభిమానులకు కామెంటరీ బాక్స్‌లో నాని కనిపించడం ఒక ట్రీట్‌గా మారింది.