నితిన్ దీక్ష‌ అందుకోసమేనా!

టాలీవుడ్ యంగ్ హీరో నితిన్ గ‌త కొన్ని సినిమాలుగా వ‌రుస ఫ్లాపుల్లో ఉన్నాడు. ప్ర‌తీ సినిమాపై ఆశ‌లు పెట్టుకోవ‌డం, ఆ సినిమా నితిన్ ఆశ‌ల్ని చ‌ల్లార్చ‌డం మామూలైపోయింది. దీంతో ఈసారి ఎలాగైనా హిట్ కొట్టాలనే క‌సితో నితిన్, త‌న‌కు గ‌తంలో భీష్మ లాంటి బ్లాక్ బ‌స్ట‌ర్ హిట్ ఇచ్చిన వెంకీ కుడుముల ద‌ర్శ‌క‌త్వంలో సినిమాను చేశాడు.

వెంకీ కుడ‌ముల నితిన్ కోసం మ‌రోసారి కామెడీ ఎంట‌ర్టైనర్ ను రూపొందించాడు. శ్రీలీల హీరోయిన్ గా తెర‌కెక్కిన ఈ సినిమాను మైత్రీ మూవీ మేక‌ర్స్ బ్యాన‌ర్ భారీ బ‌డ్జెట్ తో నిర్మించింది. మార్చి 27న రాబిన్‌హుడ్ ప్రేక్ష‌కుల ముందుకు రానుంది. ఆల్రెడీ నితిన్- వెంకీ కాంబోలో వ‌చ్చిన భీష్మ మంచి హిట్ అవ‌డంతో రాబిన్‌హుడ్ పై అంద‌రికీ భారీ అంచ‌నాలున్నాయి.

ఆ అంచ‌నాల‌కు త‌గ్గ‌ట్టే సినిమా నుంచి రిలీజైన ప్ర‌తీ కంటెంట్ ఆడియ‌న్స్ కు రాబిన్‌హుడ్ పై అంచ‌నాలను పెంచేసింది. నితిన్ త‌న కెరీర్లో ఎప్పుడూ ఏ సినిమాకీ చేయ‌నంత పబ్లిసిటీ ఈ సినిమాకు చేస్తున్నాడు. దానికి కార‌ణం నితిన్ కు రాబిన్‌హుడ్ కంటెంట్ పైన‌, డైరెక్ట‌ర్ వెంకీ కుడుముల‌పై ఉన్న న‌మ్మ‌క‌మే.

రాబిన్‌హుడ్ ప్రమోష‌న్స్ లో భాగంగా నితిన్ ఓ ఇంట‌ర్య్వూలో తాను రాబిన్‌హుడ్ మూవీ స‌క్సెస్ అవాల‌ని హ‌నుమాన్ దీక్ష తీసుకున్న‌ట్టు తెలిపాడు. గ‌తంలో కూడా నితిన్ ప‌లుసార్లు హ‌నుమాన్ మాల ధ‌రించిన విష‌యం తెలిసిందే. కానీ ఈసారి నితిన్ హ‌నుమాన్ దీక్ష మాత్ర‌మే తీసుకున్నాడు. దానికి కార‌ణం సినిమా ప్ర‌మోష‌న్సే అని చెప్పాడు నితిన్. మాల ధ‌రిస్తే ఎప్పుడూ సేమ్ కాస్ట్యూమ్ లో ఉండాలని, ఇంట‌ర్వ్యూ టైమ్ లో ఒకే కాస్ట్యూమ్ లో క‌నిపిస్తే పాత ఇంట‌ర్వ్యూ అనుకుంటార‌ని అందుకే ఈసారి కేవ‌లం దీక్ష మాత్ర‌మే తీసుకున్నాన‌ని నితిన్ తెలిపాడు.

కేవ‌లం బ‌ట్ట‌లు మాత్ర‌మే నార్మ‌ల్ గా వేసుకుంటున్నాన‌ని, దీక్ష‌కు, మాల‌కు నియ‌మాల‌న్నీ సేమ్ అని, మూడు వారాల పాటూ తాను ఈ దీక్ష తీసుకుంటున్నాన‌ని నితిన్ తెలిపాడు. త‌న తాత‌య్య ఆంజ‌నేయ స్వామికి చాలా పెద్ద భ‌క్తుడ‌ని, చిన్న‌ప్పుడు ఆయ‌న ప్ర‌తీ శ‌నివారం త‌న‌ను కూడా గుడికి తీసుకెళ్లేవార‌ని, త‌న జ‌యం సినిమాలో కూడా ఆంజ‌నేయ స్వామి జెండా ఉంటుంద‌ని, ఆ సినిమా బ్లాక్ బ‌స్ట‌ర్ అవ‌డంతో అప్ప‌ట్నుంచి తాను ఆంజ‌నేయ స్వామికి పెద్ద భ‌క్తుడిగా మారాన‌ని నితిన్ చెప్పాడు. ఆ త‌ర్వాత నితిన్ శ్రీ ఆంజ‌నేయం అనే సినిమాను కూడా చేసిన సంగ‌తి తెలిసిందే.