పుష్ప 2: ఓపెనింగ్స్ ఎలా ఉండబోతున్నాయి?

అల్లు అర్జున్, రష్మిక మందన్న జంటగా నటిస్తున్న ‘పుష్ప 2’ పాన్ ఇండియా స్థాయిలో ప్రేక్షకులను అలరించేందుకు సిద్ధమైంది. ఇప్పటికే సినిమాపై ఊహించని రేంజ్ లో బజ్ క్రియేట్ అయ్యింది. ఇక సినిమా బాక్సాఫీస్ వద్ద తప్పకుండా వెయ్యి కోట్లు అందుకుంటుందని మేకర్స్ ధీమాగా ఉన్నారు. ‘పుష్ప 1: ది రైజ్’ అంచనాలను మించిపోయి సంచలన విజయాన్ని సాధించగా, ఇప్పుడు దాని సీక్వెల్‌ ‘పుష్ప 2: ది రూల్‌’ పైన భారీ అంచనాలు నెలకొన్నాయి.

సుకుమార్ దర్శకత్వంలో రూపొందిన ఈ భారీ చిత్రాన్ని డిసెంబర్‌ 5న గ్రాండ్‌గా విడుదల చేయబోతున్నారు. ఇప్పటికే సినిమా ప్రీ రిలీజ్ బిజినెస్ పరంగా ఇండస్ట్రీలో హాట్ టాపిక్ గా మారింది. సినిమా విడుదల అనంతరం మరింత లాభాలను అందించేలా ఉంది. ఇక చిత్రానికి దేశవ్యాప్తంగా భారీ స్పందన లభిస్తుండగా, విడుదల రోజే రికార్డు స్థాయి వసూళ్లు నమోదు చేయవచ్చని పరిశ్రమ వర్గాలు అంచనా వేస్తున్నాయి.

ప్రముఖ ఫిల్మ్‌ బాక్సాఫీస్ అనలిస్టుల అంచనాల ప్రకారం, ఈ చిత్రం మొదటి రోజే ప్రపంచవ్యాప్తంగా రూ. 270 కోట్ల వసూళ్లు సాధించవచ్చని భావిస్తున్నారు. భారతదేశంలోనే లెక్క రూ. 200 కోట్ల వరకు ఉండవచ్చని అంచనా వేస్తున్నారు. ఆంధ్రప్రదేశ్‌, తెలంగాణలోని అభిమానుల సపోర్ట్‌తో సుమారు రూ. 85 కోట్లు రాబట్టే అవకాశం ఉందట.

ఇక కర్ణాటకలో కూడా మంచి క్రేజ్ ఉంది. అక్కడి నుంచి రూ. 20 కోట్లు వచ్చే ఛాన్స్ ఉందని అంటున్నారు. తమిళనాడు నుంచి రూ. 12 కోట్లు, కేరళ నుంచి రూ. 8 కోట్లు రాబట్టవచ్చని విశ్లేషకులు అంచనా వేస్తున్నారు. మిగతా భారతీయ ప్రాంతాల నుంచి రూ. 75 కోట్లు వసూళ్లు వచ్చే అవకాశం ఉందని నివేదికలు చెబుతున్నాయి. ఓవర్సీస్ మార్కెట్లలో కూడా పుష్ప 2 సత్తా చాటేందుకు సిద్దమైంది.

అంతర్జాతీయంగా ఈ చిత్రం విడుదల రోజే రూ. 70 కోట్ల వసూళ్లు రాబట్టవచ్చని భావిస్తున్నారు. ఈ రేంజ్ వసూళ్లు సాధించగలిగితే, పుష్ప 2 తొలి రోజే మొత్తం రూ. 270 కోట్లను దాటిపోనుంది. ఇంత భారీ అంచనాలతో విడుదలవుతున్న పుష్ప 2 పై ఇండస్ట్రీలో ఉత్కంఠ నెలకొంది. అల్లు అర్జున్ అభిమానులు ఈ సినిమా కోసం ఎంతో ఆసక్తిగా ఎదురుచూస్తున్నారు. తొలి పార్ట్‌లో అల్లు అర్జున్ పోషించిన పుష్పరాజ్ పాత్రకు దేశవ్యాప్తంగా విశేష ఆదరణ లభించడంతో, ఈ సీక్వెల్‌పై కూడా భారీ అంచనాలు నెలకొన్నాయి. మరి ‘పుష్ప 2’ వసూళ్లతో పాత రికార్డులను బ్రేక్ చేస్తుందో లేదో చూడాలి.